HAMAS zudlik bilan muzokaralarga tayyorligini bildirmoqda

AQSh prezidenti Donald Trampning “yakuniy ogohlantirishi” ortidan Falastinning “HAMAS” terrorchilik harakati G‘azo sektoridagi urushni to‘xtatish va “barcha mahbuslarni” ozod qilish uchun zudlik bilan muzokaralar stoliga o‘tirishga tayyorligini ma’lum qildi. 7-sentabr, yakshanba oqshomida tarqatilgan bayonotda HAMAS “Amerika tomonining o‘t ochishni to‘xtatishga erishishga qaratilgan ba’zi g‘oyalari” vositachilar orqali olinganini aytdi.

2023-yil 7-oktabrda asirga olingan isroillik garovga olinganlarni ozod qilish evaziga radikal islomiy harakat Isroildan “urushni tugatish, G‘azo sektoridan qo‘shinlarni to‘liq olib chiqish va G‘azo sektorini boshqarish uchun mustaqil falastinliklardan iborat qo‘mita tuzish haqida aniq bayonot berishni” talab qilmoqda.

O‘sha kuni ertalab Oq uy rahbari o‘zining Truth Social ijtimoiy tarmog‘ida Isroil o‘zi taklif qilgan kelishuv shartlarini qabul qilgani va HAMAS ham ular bilan birga borishi kerakligini yozgan edi. "Men HAMASni rad etish oqibatlari haqida ogohlantirdim. Bu mening oxirgi ogohlantirishim, boshqasi bo'lmaydi", - deya ta'kidladi Tramp.

So‘nggi kunlarda Isroil G‘azo shahridagi quruqlikdagi amaliyotini kengaytirdi, “Gidyon aravalari II” operatsiyasida HAMAS qarorgohlarini qo‘lga kiritdi. Isroil mudofaa kuchlari (IDF) G‘azo sektori janubidagi Xon-Yunisda “gumanitar hudud” tashkil etilganini e’lon qildi, bu hududda G‘azo shahrining barcha aholisi zudlik bilan ko‘chib o‘tishga chaqirildi.