Hindiston Tashqi ishlar vazirligi: AQSh 487 hindistonlik muhojirni deportatsiya qiladi

AQSh hukumati Hindistonni 487 nafar ehtimoliy hindistonlik fuqaro haqida ogohlantirdi, ularga nisbatan deportatsiya qarori qabul qilingan. Bu haqda Hindiston Tashqi ishlar vazirligi xabar berdi.

“Bizga 487 nafar hindistonlik fuqaroga nisbatan deportatsiya qarori qabul qilingani haqida ma’lum qilindi,” – dedi Hindiston Tashqi ishlar vaziri o‘rinbosari Vikram Misri.

5-fevral kuni The New York Times nashri AQSh Mudofaa vazirligiga tayanib, Hindistonning Amritsar shahriga AQSh harbiy samolyoti yetib kelgani haqida xabar berdi. Samolyot bortida noqonuniy hindistonlik muhojirlar bo‘lib, ular AQSh prezidenti Donald Trampning noqonuniy muhojirlarni chiqarib yuborish bo‘yicha kampaniyasi doirasida deportatsiya qilingan.

Donald Tramp prezidentlikka kelganidan so‘ng, avvaldan va’da qilgan “muhojirlarni deportatsiya qilish operatsiyasi”ni amalga oshira boshladi. 21-yanvar kuni AQSh Immigratsiya va bojxona xizmati noqonuniy muhojirlarni qo‘lga olish ishlarini boshladi. Birinchi deportatsiya to‘lqiniga Hindistondan bo‘lgan muhojirlar ham kirdi. OAV ma’lumotlariga ko‘ra, 5-fevral kuni Amritsar shahriga kelgan AQSh harbiy samolyoti bortida 100 dan 205 nafargacha odam bo‘lishi mumkin.

20-yanvar kuni Donald Tramp prezident sifatida o‘zining birinchi nutqida noqonuniy migratsiyani zudlik bilan to‘xtatishini va “millionlab muhojirlarni” deportatsiya qilish jarayonini boshlashini e’lon qildi. O‘sha kuni u mamlakat janubiy chegarasidagi vaziyat tufayli umumiy milliy favqulodda holat rejimini joriy qildi.