Lukoil AQSh sanksiyalari tufayli xalqaro aktivlarini sotmoqda

Rossiyaning eng yirik neft kompaniyalaridan biri bo'lgan Lukoil o'zining xalqaro aktivlarini "ba'zi mamlakatlar tomonidan kompaniya va uning sho''ba korxonalariga nisbatan cheklovchi choralar joriy etilishi munosabati bilan" sotish niyatini e'lon qildi. "Potensial xaridorlarning takliflarini ko'rib chiqish boshlandi", deyiladi Lukoilning ingliz tilidagi veb-saytida 27-oktabr, dushanba kuni chop etilgan press-relizda.

Unda aktivlarni sotish AQSh Moliya vazirligining Xorijiy aktivlarni nazorat qilish boshqarmasi (OFAC) litsenziyasiga muvofiq amalga oshirilayotgani aytilgan bo'lib, u Rosneft va Lukoil ishtirokidagi bitimlarni tugatishni tartibga soladi.

AQShning Lukoil va Rosneftga qarshi sanksiyalari

22-oktabr kuni AQSh Moliya vazirligi Moskva Ukrainada boshlagan urushni tugatish uchun "Rossiyaning tinchlik jarayoniga jiddiy qiziqishi yo'qligi" sababli qo'shimcha sanksiyalar e'lon qildi. "Prezident Putinning bu bema'ni urushni tugatishdan bosh tortganini hisobga olgan holda, Moliya vazirligi Kremlning urush mashinasini moliyalashtirayotgan Rossiyaning ikkita eng yirik neft kompaniyasiga (Rosneft va Lukoil – tahr.) qarshi sanksiyalar joriy qilmoqda", dedi AQSh Moliya vaziri Skott Bessent press-relizda.

Hujjatga ko'ra, sanksiyalar Rossiyada joylashgan Lukoil va Rosneft sho'ba korxonalariga ham qaratilgan. AQSh Moliya vazirligi ro'yxatiga 34 ta sho''ba korxona kiritilgan: ulardan 28 tasi Rosneftga, oltitasi esa Lukoilga tegishli.

Bundan tashqari, "bir yoki bir nechta bloklangan sub'ektlar tomonidan 50% yoki undan ko'proqqa tegishli bo'lgan" har qanday yuridik shaxslar bloklangan. Qoidabuzarliklar "AQSh va xorijiy fuqarolarga nisbatan fuqarolik yoki jinoiy javobgarlikka tortiladi".

15-oktabr kuni, Rossiyaning Ukrainaga qarshi urushi to'rtinchi yilga cho'zilgan bir paytda, Buyuk Britaniya hukumati Rossiyaning Lukoil va Rosneft kompaniyalariga qarshi sanksiyalar joriy qildi.