Moskvada Krokus Siti Xoll terakti yuzasidan sud jarayoni boshlandi

Moskvaning Ikkinchi G‘arbiy okrug harbiy sudi Moskva viloyatidagi “Krokus Siti Xoll” konsert zalida sodir etilgan terakt yuzasidan qo‘zg‘atilgan jinoiy ishning mohiyatini ko‘rib chiqishga kirishdi. Sudya 4-avgust, dushanba kuni ochilganidan so‘ng davlat ayblovining iltimosiga binoan sud majlislari yopiq eshiklar ortida o‘tkazilishini ma’lum qildi.

Prokuratura tergov sirini saqlash va sud majlisi ishtirokchilari xavfsizligini ta’minlash zarurligini asoslab, sud jarayonini yopiq o‘tkazishni talab qildi, deb yozadi “Interfaks”.

"Krokus" terakti ishi bo'yicha 19 nafar ayblanuvchi bor

Ishda jami 19 nafar ayblanuvchi bor, ular orasida fojiadan keyingi birinchi kunning o‘zidayoq hibsga olingan Dalerjon Mirzoyev, Saidakram Rachabalizoda, Shamsidin Fariduni va Muhammadsobir Faizov kabi hujumning aybdorlari bor.

Ular terrorchilik harakati sodir etish, terrorchilik faoliyatiga yordam berish, shuningdek, terrorchilik faoliyatini amalga oshirish maqsadida tayyorgarlikdan o‘tish va boshqa jinoyatlarda ayblanmoqda. Sud majlisida ishtirokchilar ko‘pligi sababli sud majlislari Moskva shahar sudi binosida bo‘lib o‘tmoqda, deb yozadi “Interfaks”. 2000 dan ortiq odam jabrdiyda.

Krokusdagi terakt va "Ukraina izi"

Moskva viloyatining Krasnogorsk shahridagi Krokus Siti Xollda yuz bergan terakt Rossiya tarixidagi eng qonli teraktlardan biri bo‘ldi. 2024-yilning 22-martida qurolli shaxslar “Piknik” rok-guruhi kontserti boshlanishidan oldin kontsert zaliga bostirib kirib, tashrif buyuruvchilar va xodimlarga qarata o‘t ochgan, shundan so‘ng binoda yong‘in boshlangan. Rossiya Federatsiyasi Bosh prokuraturasi maʼlumotlariga koʻra, 147 kishi halok boʻlgan, yana uch kishi bedarak yoʻqolgan, 550 kishi yaralangan. Etkazilgan zarar 5,7 milliard rublni tashkil etdi.

Hodisa uchun javobgarlikni “Islom davlati” terrorchilik guruhining Afg‘onistonda faoliyat yuritayotgan bo‘limi hisoblangan “Viloyat Xuroson” terrorchilik guruhi o‘z zimmasiga oldi. Biroq, FSB deyarli darhol teraktda "Ukraina izi" borligini e'lon qildi. Kiyev bu ayblovlarni qat'iyan rad etadi.