Oq uy: Tramp va Putin uchrashuvi 11-avgustda bo‘lishi mumkin

AQSh va Rossiya prezidentlari Donald Tramp va Vladimir Putin kelasi haftada, 11-avgustdan boshlab shaxsiy uchrashuv o‘tkazishlari mumkin. AP agentligining 6-avgust, chorshanba kuni xabar berishicha, bu norasmiy bayonotni Oq uy vakili bergan. Biroq, uning shartiga ko‘ra, ikki davlat rahbarlarining ehtimoliy uchrashuvi joyi hali aniqlanmagan va uchrashuvning o‘zi ham davlat rahbarlarining ish jadvaliga kiritilmagan.

Shu tariqa, amerikalik rasmiy The New York Times gazetasining AQSh prezidentining maxsus vakili Stiv Vitkofning Moskvada Vladimir Putin bilan uchrashuvidan ko‘p o‘tmay paydo bo‘lgan xabarini bilvosita tasdiqladi. Trampning oʻzi Truth Social ijtimoiy tarmogʻida ushbu uchrashuv natijalarini sharhlar ekan, u “juda samarali” boʻlganini va “juda katta yutuqlarga erishilganini (Ukrainada oʻt ochishni toʻxtatish imkoniyati boʻyicha muzokaralarda. – Tahr.)” qayd etgan.

Ayni paytda Tramp va Putin o‘rtasida yaqin kelajakda rejalashtirilgan uchrashuv haqidagi ma’lumotni Germaniyaning dpa axborot agentligi ham tasdiqladi. Bu maʼlumotni Germaniya hukumati doiralaridagi manbalardan Tramp Yevropa hukumatlari rahbarlariga qoʻngʻiroq qilib, Vitkof va Putin oʻrtasidagi uchrashuv natijalari haqida aytib berganidan keyin olgani taʼkidlangan. “AQSh prezidenti Donald Tramp yaqin orada Kreml rahbari Vladimir Putin bilan uchrashib, Ukrainadagi urushni tugatish bo‘yicha muzokaralar o‘tkazmoqchi”, — deyiladi xabarda.