Yaman husiylari Tel-Aviv yaqinidagi harbiy obyektga raketa hujumi uyushtirdi

Yaman husiylari Tel-Aviv yaqinidagi harbiy obyektga raketa hujumi uyushtirdi. Bu haqda husiylar tomonidan tuzilgan qurolli kuchlar vakili Yahyo Sariya ma’lum qildi.

“Yaman Qurolli kuchlari Raketa Kuchlari Falastin 2 tipidagi gipertovushli ballistik raketa bilan bosib olingan Yaffa hududidagi Isroil harbiy nishoniga hujum qildi. Operatsiya o‘z maqsadlariga muvaffaqiyatli erishdi”, dedi Sariya.

Bugun, 24 dekabrga o‘tar kechasi Isroil armiyasi Yamandan uchirilgan raketa Isroil havo hududiga kirgunga qadar urib tushirilganini ma’lum qildi. Tel-Avivning 20 ga yaqin aholisi shaharda havo hujumi haqida ogohlantirish e’lon qilinganidan so‘ng jarohat oldi. Ular boshpanalarga shoshilish paytida yaralangan.

G‘azo sektoridagi mojaro avj olgandan so‘ng, husiylar Isroilni o‘qqa tutishi va Falastin anklavidagi operatsiya to‘xtatilmaguncha unga aloqador kemalarning Qizil dengiz va Bob al-Mandeb bo‘g‘ozi suvlari orqali o‘tishiga ruxsat bermasligi haqida ogohlantirgan. O‘tgan yilning noyabr oyidan beri husiylar Qizil dengiz va Adan ko‘rfazida o‘nlab tinch aholi kemalariga hujum qilgan.

Husiylarga javoban Amerika rasmiylari Qizil dengizda navigatsiya erkinligini ta’minlash va kemalarni himoya qilish uchun xalqaro koalitsiya tuzilgani va Prosperity Guardian operatsiyasi boshlanganini e’lon qildi. Keyinchalik Buyuk Britaniya va AQSH Qurolli kuchlari Yamanning turli viloyatlaridagi isyonchilarning harbiy nishonlariga muntazam zarba bera boshladi.