Yevropa Ittifoqi AQShga qarshi javob tariflarini 90 kunga kechiktirdi

Yevropa Ittifoqi Vashington tomonidan toʻxtatilganiga javoban AQShdan import qilinadigan tovarlarga javob bojlari joriy etilishini 90 kunga kechiktiradi. Bu haqda 10-aprel, payshanba kuni Yevrokomissiya prezidenti Ursula fon der Leyen ma’lum qildi.

"Biz Prezident Trampning bayonotini e'tiborga oldik. Biz muzokaralarga imkoniyat bermoqchimiz. A'zo davlatlarimiz tomonidan kuchli qo'llab-quvvatlangan Yevropa Ittifoqining qarshi choralarini yakunlash bilan birga, ularni 90 kunga qoldiramiz", - dedi u. Shu bilan birga, siyosatchi muzokaralar natija bermasa, qarshi choralar kuchga kirishini qayd etdi. "Men aytganimdek, barcha variantlar muzokaralar stolida qoladi", deya qo'shimcha qildi fon der Leyen.

Yevropa Ittifoqi AQSh importiga javob bojlari joriy etishga rozi

7-aprel kuni YeI Savdo komissari Marosh Shefchovich Bryussel 15-apreldan boshlab Qo'shma Shtatlardan keladigan tovarlarga birinchi javob tariflarini joriy etishni rejalashtirayotganini e'lon qildi. Ular Amerika jinsi shimlari, viski, yeryong'oq, mototsikl va boshqa tovarlarga maxsus tariflarni o'z ichiga oladi.

AQShning boshqa mahsulotlariga bojlar may oyi o'rtalarida kuchga kirishi kutilgan edi. Rejalar AQSh qishloq xo'jaligi mahsulotlariga, jumladan parranda go'shti, mol go'shti, ba'zi dengiz mahsulotlari, yong'oqlar, tuxumlar, sut mahsulotlari, shakar va sabzavotlarga ta'sir qiladi. Bundan tashqari, ro'yxatda ba'zi sanoat tovarlari, charm buyumlar, maishiy texnika, asboblar, plastmassa va yog'och bo'lishi mumkin.