Yevropa komissiyasi Rossiya gazidan voz kechish rejasini taqdim etdi
Yevrokomissiya 6 may, seshanba kuni Strasburgda 2027 yilgacha Rossiyaning qazib olinadigan yonilg‘isidan butunlay voz kechish rejasini eʼlon qildi. Ushbu reja doirasida bosqichma-bosqich «yo‘l xaritasi»ni eʼlon qilish ikki marta qoldirildi. Bu safar u umumiy maʼnoda taqdim etildi va rasmiy qonunchilik takliflari bir oydan keyin eʼlon qilinadi, dedi Yevropa Ittifoqining energiya bo‘yicha komissari Dan Yorgensen.
REPowerEU deb nomlangan Rossiya Federatsiyasi energiya manbalaridan bosqichma-bosqich voz kechish dasturi Yevropa Ittifoqi darajasidagi qonunchilikka o‘zgartirishlar va 2025 yil oxirigacha bo‘lgan majburiy milliy rejalarni o‘z ichiga oladi, deya tushuntirdi Yevropa komissari.
Yangi qoidalar, masalan, Rossiya gaz yetkazib beruvchilari bilan yangi shartnomalarning oldini olish va mavjud spot shartnomalar 2025 yil oxirigacha bekor qilinishini anglatadi. Yevropa Komissiyasiga ko‘ra, bu chora Yevropa Ittifoqi Rossiya gazining qolgan taʼminotini joriy yil oxirigacha uchdan bir qismga qisqartirishiga olib keladi. Hozirda Rossiya gazining ulushi Yevropa Ittifoqi butun gaz bozorining 13 foizini tashkil qiladi. Rossiyaning Ukrainaga keng ko‘lamli bostirib kirishidan oldin bu ulush Yevropa Ittifoqida o‘rtacha 45 foizga yetgandi.
.png "YouTube UZREPORT TV")
