O‘zbekistonda 1-maydan elektr energiyasi uchun yangi tarif joriy etiladi

Vazirlar Mahkamasining «Yoqilg‘i-energetika resurslari iste’molchilarini qo‘llab-quvvatlash maqsadida 2024-2025 yillarda yoqilg‘i-energetika resurslari narxlarining bosqichma-bosqich o‘zgarish grafigiga o‘zgartishlar va qo‘shimcha kiritish haqida» 194-son qarori qabul qilindi, deb xabar beradi Energetika vazirligi.

Qayd etilishicha, davlat rahbarining topshirig‘iga muvofiq ishlab chiqilgan mazkur qaror bilan Vazirlar Mahkamasining 2024 yil 16 apreldagi 204-son qarori bilan tasdiqlangan 2024-2025 yillarda yoqilg‘i-energetika resurslari narxlarining bosqichma-bosqich o‘zgarish grafigiga aholi uchun yengillik yaratadigan o‘zgartishlar kiritilmoqda.

Masalan, yoqilg‘i-energetika resurslari narxlarining oshishi muddati 1 apreldan 1 may sanasiga ko‘chirildi.

Qolaversa, 201 kVt/soatdan 1000 kVt/soatgacha bo‘lgan differensiallashgan tarif bo‘yicha iste’mol miqdori orasiga yangi miqdor kiritilmoqda. Ya’ni 2025 yil 1 maydan e’tiboran aholi iste’molchilari 201 kVt/soatdan 500 kVt/soatgacha bo‘lgan yangi miqdor oralig‘ida har bir kilovatt/soat uchun 800 so‘mdan to‘laydi (shu paytgacha 201 kVt/soatdan 1000 kVt/soatgacha bo‘lgan qismi uchun 900 so‘mdan haq to‘langan).

Ta’kidlanishicha, bir oyda o‘rtacha 500 kVt/soat miqdorida elektr energiyasi sarflaydigan xonadon vakillari buning uchun 2025 yilning 1 may sanasiga qadar 360 ming so‘m to‘lardi (200 kVt/soat bazaviy norma uchun 90 ming so‘m, 201 kVt/soatdan 500 kVt/soat uchun 270 ming so‘m). Tarif o‘zgarishlaridan so‘ng bir oyda o‘rtacha 500 kVt/soat tok ishlatadigan xonadon buning uchun 360 ming so‘m to‘laydi (200 kVt/soat bazaviy norma uchun 120 ming so‘m, 201 kVt/soatdan 500 kVt/soat uchun 240 ming so‘m). Ya’ni ular uchun narx oshayotgani yo‘q.

Bundan tashqari, qaror bilan elektr energiyasi va tabiiy gaz narxlari har yili 1 maydan bir marotaba yillik inflatsiya darajasidan kelib chiqqan holda 10 foizdan yuqori bo‘lmagan miqdorda indeksatsiya qilib borilishi belgilanmoqda.