"QQS to‘lovchiga aylanish uchun yillik aylanma, yaʼni 1 mlrd so‘mni o‘zgartirish rejamiz yo‘q"— Mubin Mirzayev

Qo‘shimcha qiymat solig‘i to‘lovchiga aylanish uchun yillik aylanma (oborot), ya’ni 1 mlrd so‘mni qayta ko‘rib, o‘zgartirish reja qilinmayapti. Bu haqda Soliq qo‘mitasi raisining birinchi o‘rinbosari Mubin Mirzayev AOKAda o‘tkazilgan matbuot anjumanida so‘z yuritdi.

“2019-yilda yangi soliq konsepsiyasi ishlanayotganida yuqori chegarani qo‘ygan edik. Bizda bir necha xil: 100 mln, 300 mln, 500 mln va 1 mlrd so‘mlik variantlar bor edi. Ko‘p tadbirkorlarni qiynamaslik uchun eng yuqori — 1 mlrd so‘mlik chegarani qo‘ygandik va uni kamida 5−6 yil o‘zgartirmaslikni rejalashtirgandik. O‘sha paytdagi kurs bilan 1 mlrd so‘m 125 ming dollar edi. Boshqa davlatlarni ham o‘rganganimizda, deyarli bironta mamlakatda 125 ming dollarlik QQS chegarasi yo‘q edi. Aksariyatida 30 ming, 50 ming, ko‘pi bilan 60−70 ming dollar edi. Shuning uchun biz yuqori chegarani qo‘ygan edikki, tadbirkorlarni QQSga o‘tishga kamida 5 yil o‘rgatib olish maqsadi bo‘lgan”, — deydi u.

Uning ta’kidlashicha, 1 mlrd so‘mni 500 millionga tushirish taklifi ham bildirilmoqda.

“Lekin soliq ma’murchiligi nuqtai nazaridan soliq qo‘mitasi munosabat bildiryapmizki, 1 mlrd so‘m eng optimal summa. Hozirda soliq to‘lovchilar bilan shu variantda ishlashga va soliq ma’murchiligini yuritishga o‘rganib qoldik. O‘ylaymanki, chegarani tushirish unchalik to‘g‘ri emas va uni oshirish ham unchalik yaxshi emas. Chunki bu QQS chegarasi bilan ishlaydigan tadbirkorlar ham bunga o‘rganib qoldi va ularga u darajada katta yuk tushmaydi. Sababi bu men bilan siz, ya’ni iste’molchilar to‘laydigan soliq hisoblanadi, buni korxonalarga hech qanday foydasi ham, zarari ham yo‘q. Agar korxona mazkur QQSni to‘g‘ri tushungan va hamma hujjatlarini to‘g‘ri shakllantirgan bo‘lsa, bunda unga hech qanday muammo tug‘dirmaydi”, — deydi Mubin Mirzayev.