Mikromoliya tashkilotlari tomonidan islomiy moliya xizmatlarini ko‘rsatishga oid nizom tasdiqlandi

Markaziy bank mikromoliya tashkilotlarining islomiy moliyalashtirishga oid xizmatlarni ko‘rsatish tartibi to‘g‘risidagi nizomni tasdiqladi.

Hujjat bilan islomiy moliyalashtirishga oid xizmatlarni ko‘rsatish uchun mikromoliya tashkilotlari maxsus kengash tashkil etishi kerak. U mikromoliya tashkiloti ishtirokchilari yoki aksiyadorlarining umumiy yig‘ilishida saylangan kamida 5 kishidan iborat bo‘ladi.

Uning faoliyatini autsorsing asosida jalb qilish mumkin. Bunda mikromoliya tashkiloti jalb qilingan maxsus kengash faoliyati bilan bog‘liq tavakkalchiliklarni boshqarish uchun javobgardir.

Mikromoliya tashkilotlari islomiy moliya bilan bog‘liq quyidagi xizmatlarni ko‘rsatishi mumkin:

- islomiy ijara;

- muzoraba — foydani taqsimlashga asoslangan moliyalashtirish;

- murobaha — nasiya savdoga asoslangan moliyalashtirish;

- mushoraka — sherikchilik, ya’ni foyda va zararlarni taqsimlashga asoslangan moliyalashtirish;

- salam — oldindan to‘lovga asoslangan moliyalashtirish.

Maxsus kengash a’zolarining kamida bir nafari islom huquqi sohasida oliy ma’lumotga, bir nafari oliy yuridik ma’lumotga, qolgan a’zolari esa islomiy moliyalashtirishga oid xalqaro sertifikatga ega bo‘lishi lozim.

An’anaviy xizmatlar ko‘rsatilganda, islomiy moliyalashtirishga oid xizmatlar ko‘rsatishda buxgalteriya hisobi alohida yuritilishi kerak.

Taqiqlangan va maxsus kengash ko‘rsatmalariga zid bo‘lgan tovarlar savdosi bilan shug‘ullanish hamda faoliyat turlarini moliyalashtirish taqiqlanadi. Xususan, chet el valyutasi, kriptoaktivlar, oltin va kumushlarni sotib olish uchun pul berish mumkin emas.