AQSH bilan qo‘shma loyiha O‘zbekistonga 50 mingdan ortiq metan sizib chiqishini aniqlash va bartaraf etish imkonini berdi

AQSH elchisi Jonatan Xenik O‘zbekistonning “Hududgaztaʼminot” gaz taqsimlash kompaniyasi va Merilendda joylashgan Climate Compass shuʼba korxonasi GasGreen Asia qo‘shma loyihasining yutuqlarini nishonlash maqsadida tadbir o‘tkazdi, deb xabar berdi diplomatik missiya matbuot xizmati.

2023 yil mart oyida boshlangan ushbu loyiha O‘zbekistonning yer usti gaz taqsimlash tizimidagi tabiiy gaz sizib chiqishini aniqlash va taʼmirlashga oid bo‘lib, u O‘zbekistonning yashil iqtisodiyotga o‘tishi hamda uning «Metan bo‘yicha global majburiyat» doirasidagi ishlariga hissa qo‘shadi.

Tadbirda O‘zbekiston hukumatining rasmiylari, “Hududgaztaʼminot”, GasGreen Asia, YETTB vakillari, AQSH diplomatlari hamda mahalliy matbuot vakillari ishtirok etdi. Koreyaning Ecoeye Co., Ltd. kompaniyasi loyihaning asosiy sarmoyadori bo‘lib, u Koreya bilan iqlim bo‘yicha Parij kelishuvining 6.2-moddasiga asosan loyihani muvofiqlashtiradi.

"AQSH O‘zbekistonning yashil iqtisodiyotga keng ko‘lamli o‘tishga bo‘lgan harakatini olqishlaydi. Ushbu loyiha O‘zbekistonning to‘g‘ridan-to‘g‘ri xorijiy investitsiyalarni jalb qilish hamda issiqxona gazlari emissiyasini kamaytirish borasidagi saʼy-harakatlarini qo‘llab-quvvatlaydi", — dedi elchi Henik.

Qayd etilishicha, loyiha boshlanganidan beri 50 mingdan ortiq gaz sizib chiqish holati aniqlandi, o‘lchandi va taʼmirlandi, buning natijasida yiliga yetti million tonnadan ortiq karbonat angidrid ekvivalenti emissiyasi kamayishiga erishildi. Loyiha 200 dan ortiq mahalliy ish o‘rni yaratdi, jumladan, muhandislar, maʼlumotlar bo‘yicha mutaxassislar va loyiha menejerlari amerikalik texnik mutaxassislardan intensiv trening oldilar.

Taʼmirlash natijasida “Hududgaztaʼminot” aksiyadorlik jamiyati gaz yo‘qotilishining oldini olish orqali o‘nlab million dollar mablag‘ni tejab, atrof-muhitga katta foyda keltirdi.