O‘zbekiston va Rossiya o‘rtasida 2026-2030-yillarga mo‘ljallangan harbiy sohadagi strategik hamkorlik dasturi imzolandi

22-yanvar kuni O‘zbekiston mudofaa vaziri general-mayor Shuxrat Xalmuxamedov rasmiy tashrif bilan kelgan Rossiya Federatsiyasi mudofaa vaziri Andrey Belousov boshchiligidagi harbiy delegatsiyani qabul qildi.

Dastlab mehmonlarni faxriy qorovul ishtirokida rasmiy kutib olish tadbiri bo‘lib o‘tdi. Harbiy orkestr tomonidan ikki davlat madhiyasi ijro etildi.

Mudofaa vazirligi markaziy apparatida o‘tkazilgan ikki tomonlama hamkorlik uchrashuvida general-mayor Shuxrat Xalmuxamedov delegatsiya a’zolarini O‘zbekistonga uyushtirgan tashrifi bilan qutlab, Oʻzbekiston va Rossiya oʻrtasida ko‘plab sohalarda olib borilayotgan hamkorlik ishlari aloqalarini yanada mustahkamlashga xizmat qilayotganini taʼkidladi.

Uchrashuvlarda delegatsiya rahbari bilan O‘zbekiston-Rossiya hamkorligining mudofaa sohasidagi bugungi holati va uni rivojlantirish istiqbollari muhokama etildi.

Uchrashuv so‘ngida mudofaa vazirlari tomonidan Rossiya va Oʻzbekiston mudofaa vazirliklari oʻrtasidagi 2025-yilga moʻljallangan hamkorlik rejasi hamda O‘zbekiston va Rossiya o‘rtasida 2026-2030 yillarga mo‘ljallangan harbiy sohadagi strategik hamkorlik dasturi imzolandi.

2025-yilga moʻljallangan hamkorlik rejasi ikki davlat harbiy idoralari faoliyatining barcha yoʻnalishlari boʻyicha 50 ta qoʻshma tadbirni oʻz ichiga oladi.

Rasmiy qabuldan so‘ng Rossiya mudofaa vaziri Andrey Belousov boshchiligidagi harbiy delegatsiya vakillari “G‘alaba bog‘i” yodgorlik majmuasiga tashrif buyurib, faxriy qorovul ishtirokida “Matonat madhiyasi” monumenti poyiga gul qo‘ydilar hamda “Shon-sharaf” davlat muzeyi eksponatlari va “G‘alaba bog‘i” yodgorlik majmuasining boshqa ko‘plab monumentlari bilan tanishdilar.

Eslatib o'tamiz, bundan oldin Shavkat Mirziyoyev Rossiya mudofaa vaziri Andrey Belousovni qabul qilgani haqida xabar bergan edik. Uchrashuvda O‘zbekiston-Rossiya keng qamrovli strategik sheriklik va ittifoqchilik munosabatlarini Rossiya prezidentining 2024-yil may oyida O‘zbekistonga davlat tashrifi chog‘ida erishilgan kelishuvlarni amalga oshirish nuqtayi nazaridan yanada rivojlantirish va mustahkamlash masalalari ko‘rib chiqildi.