Prezident oziq-ovqat xavfsizligi masalalariga eʼtibor qaratdi

Prezident Shavkat Mirziyoyev raisligida Navoiy viloyatini ijtimoiy-iqtisodiy rivojlantirish vazifalari yuzasidan yig‘ilish bo‘lib o‘tmoqda.

Prezident oziq-ovqat xavfsizligi masalalariga eʼtibor qaratdi.

Zaxira qilish ishlaridagi kamchiliklar uchun ayrim hududlarda kartoshka va go‘sht narxi o‘sganiga eʼtibor qaratildi. 18 ta tuman va shaharda bozorlarni go‘sht, kartoshka, sabzi, piyoz va guruch bilan uzluksiz taʼminlashda sustkashlikka yo‘l qo‘yilayotgani, oziq-ovqat jamg‘armalari uchun Sirdaryo, Xorazm va Toshkent shahrida mahalliy byudjetdan mablag‘ ajratilmagani tanqid qilindi.

Bosh prokuratura, Raqobat qo‘mitasi va boshqa masʼul idoralarga zaxira yaratish va narx ustidan monitoring qilish bo‘yicha hududiy ishchi guruhlar tuzish, narx eng yuqori o‘sgan tuman va shaharlarda bozorlarni barqarorlashtirish bo‘yicha tezkor choralar ko‘rish topshirildi.

Viloyat, tuman va shahar hokimlari oldiga 620 ming tonna mahsulot zaxirasini yaratish vazifasi qo‘yildi.

Hududi 11 million gektar bo‘lgan Navoiyda bor-yo‘g‘i 100 ming gektarga ekin ekilayapti. Yaylovlarning 43 foizi Navoiyda joylashgani bilan respublikadagi chorva mahsulotining 5 foizini ham bermaydi.

Navoiyda 23,5 ming gektar, shundan 1,7 ming gektar sunʼiy havzada baliq yetishtiriladi. Lekin, atigi 15 foizi intensiv bo‘lgani uchun hosildorlik gektariga 2-3 tonnadan oshmayapti.

Yoki, 100 ming gektar suvli yerning 72 foizi nasosda sug‘oriladi. Nasoslarning aksariyati eskirgan va energiya sarfi yuqori. Shunga qaramasdan, viloyatning 50 ming gektarida suv tejovchi texnologiyalar bor, xolos.

Karmana, Konimex, Qiziltepa, Nurota va Xatirchi tumanlarida bu boradagi ishlar sustligi ko‘rsatib o‘tildi.

Shu munosabat bilan paxtachilikda urug‘ sifati va texnologini yangilash, hosildorlikni 70 sentnerga chiqarish, 20 ming gektar yerlarni foydalanishga kiritish, 7 ming gektar bog‘ va tokzorlarni yangilash, hamma suvli yerlarni to‘liq lazerli tekislab, takroriy ekin sifatida 10 ming gektarda kungaboqar yetishtirish zarurligi ko‘rsatib o‘tildi.

Har yili 350 ming gektar yaylovga dron bilan iqlimga mos ozuqa ekinlari, dorivor va ziravorlar urug‘larni sepish hamda 50 ming aholiga bo‘lib berish vazifasi qo‘yildi.