Lahor shahrining Savdo-sanoat palatasida O'zbekiston burchagi tashkil etiladi

Lahor shahrida O'zbekiston-Pokiston biznes-forumi o'tkazildi, deb xabar qilmoqda "Dunyo" AA.

Unda Lahor Savdo-sanoat palatasi rahbariyati va tekstil sanoati, teri va junni qayta ishlash, farmatsevtika, IT, maishiy texnika ishlab chiqarish, oziq-ovqat mahsulotlari, qog'oz ishlab chiqarish va boshqa sohalarda faoliyat yurituvchi tadbirkorlar ishtirok etdi.

Tadbirni palata prezidenti Mian Abuzar Shad ochib, O'zbekiston rahbari tomonidan Pokiston fuqarolari uchun vizalarni rasmiylashtirish soddalashtirilgani va Toshkent-Lahor yo'nalishida aviaqatnov yo'lga qo'yilgani uchun minnatdorchilik bildirdi. U o'z nutqida so'nggi yillarda o'zaro savdo-iqtisodiy aloqalar izchil rivojlanayotganini ta'kidlab, ikki davlat o'rtasidagi imkoniyatlar hali to'liq amalga oshirilmaganligini qayd etdi.

O'zbekiston elchisi Alisher To'xtayev o'z nutqida davlatimiz rahbari tomonidan amalga oshirilayotgan keng qamrovli iqtisodiy islohotlarga e'tibor qaratdi.

"Yurtimizda iqtisodiyotni liberallashtirish, ishbilarmonlik muhitini yaxshilash, va xorijiy investitsiyalarni jalb qilishga qaratilgan transformatsion o'zgarishlar amalga oshirildi. Natijada O'zbekiston YAIM hajmi ilk bor 100 milliard dollardan oshdi, tashqi savdo aylanmasi 54,4 milliard dollarga, eksport hajmi 22,4 milliard dollarga yetdi", dedi elchi.

Tadbir ishtirokchilariga, shuningdek, yengil va to'qimachilik sanoati, teri va charmni qayta ishlash, farmatsevtika va boshqa ustuvor sohalarda hamkorlik qilish istiqbollari, yurtimizda tashkil etilgan erkin iqtisodiy zonalarda (EIZ) chet el investitsiyalarini rag'batlantirish bo'yicha ko'rilgan choralar bo'yicha atroflicha ma'lumot berildi.

Ikki tomonlama savdoni ilgari surishga ko'maklashish maqsadida Palata binosida doimiy O'zbekiston burchagini tashkil etishga kelishildi.

Biznes-forum O'zbekistonda ishlab chiqariladigan maishiy texnika va qurilish mahsulotlari taqdimoti o'tkazildi.