Pokistonning yetakchi dorixonalar tarmog'i bilan farmatsevtika va madaniy yo'nalishda 2025 yildagi hamkorlik rejalari kelishildi

O'zbekiston elchisi Alisher To'xtayev kecha Pokistonning yirik dorixona tarmoqlaridan biri – "D.Watson Group" kompaniyasi rahbari, "Pokiston madaniy forumi" nodavlat-notijorat tashkiloti raisi Zafar Baxtavari bilan uchrashdi, deb xabar qilmoqda "Dunyo" AA.

Uchrashuv chog'ida farmatsevtika sohasida hamkorlik qilish, qo'shma loyihalar, jumladan tijorat faoliyatini yo'lga qo'yish, madaniy-gumanitar yo'nalishda tadbirlar tashkillashtirish masalalari ko'rib chiqildi.

Iste'molchilarga arzon dori mahsulotlarini yetkazib berish choralari, jumladan ishlab chiqarishni mahalliylashtirish darajasini ko'paytirish va ichki bozor ehtiyojlarini mahalliy farmatsevtika vositalari hisobiga qondirish bo'yicha takliflar muhokama qilindi.

Zafar Baxtavari farmatsevtika sohasida hamkorlik hamda ikki mamlakat aholisini sifatli va arzon dori-darmonlar bilan ta'minlash chorasi sifatida mamlakatlarimiz sog'liqni saqlash vazirliklari tomonidan dorilarni ro'yxatdan o'tkazish va sertifikatsiyasini o'zaro tan olish tashabbusini ilgari surdi.

Farmatsevtika sohasida hamkorlik o'rnatish, xorijiy tadbirkorlarga yaratilgan sharoitlar bilan joyida tanishish maqsadida 2025-yil fevral oyida "D.Watson Group" kompaniyasi delegatsiyasining mamlakatimizga tashrifini tashkillashtirishga kelishildi.

"Pokiston madaniy forumi" raisi O'zbekiston va Pokiston o'rtasidagi munosabatlarni mustahkamlashda madaniy aloqalarning o'rni muhimligini ta'kidladi.

Suhbatdosh o'zbek xalqidan yetishib chiqqan mutafakkir olimlar, buyuk sarkardalar, ularning merosidan yaxshi xabardorligini ma'lum qildi.

"Biz Muhammad Ali Jinnani zamonaviy Pokistonni yaratgan millat otasi sifatida ulug'laymiz. Shu bilan birga Zahiriddin Muhammad Boburni ham Pokistonda davlatchilik poydevorini qo'ygan siyosiy me'mor deya e'tirof etamiz", - deya qo'shimcha qildi u.

Muloqot yakunida tomonlarning 2025-yilgi tadbirlar rejasiga Madaniy almashinuvlar yo'nalishida yaqindan hamkorlik qilish, xususan, talabalar uchun almashinuv dasturlarini yo'lga qo'yish, Z.M.Bobur hayoti va davlatchilik faoliyatiga bag'ishlangan qo'shma tadbirlarni tashkil etish bo'yicha bandlar ham kiritildi.