Qo‘riqlash xizmati Milliy gvardiyadan IIVga o‘tkazildi
“Ichki ishlar organlarining qo‘riqlash sohasidagi faoliyatini samarali tashkil etish chora-tadbirlari to‘g‘risida”gi prezident qarori qabul qilindi. Hujjatga muvofiq, Milliy gvardiya Qo‘riqlash bosh boshqarmasi Ichki ishlar vazirligi huzuridagi Qo‘riqlash departamenti etib qayta tashkil etildi
Qarorga ko‘ra, Qo‘riqlash departamenti va uning hududiy bo‘linmalari zimmasiga quyidagi asosiy vazifalar yuklatiladi:
shartnoma asosida davlat, o‘ta muhim, toifalangan va boshqa obyektlar, taʼlim muassasalari, jismoniy va yuridik shaxslarning mol-mulki, savdo, xizmat ko‘rsatish, ko‘ngilochar va qurilish obyektlarini zamonaviy usullar orqali qo‘riqlash;
qo‘riqlanayotgan obyektlarda ichki tartib va nazorat o‘tkazish rejimlarini taʼminlash;
qo‘riqlash faoliyatiga zamonaviy axborot-kommunikatsiya vositalari va sunʼiy intellekt texnologiyalarini keng joriy etish.
Qarorda qayd etilishicha, 2026 yil 1 yanvardan boshlab qo‘riqlovga olingan banklar, yirik ishlab chiqarish korxonalari, mahalliy hokimliklar va boshqa qator obyektlarda fuqarolar kirish va chiqish joylariga shaxsning yuzini tanib olish imkoniyatiga ega texnik vositalar bosqichma-bosqich o‘rnatiladi.
Ushbu chora-tadbirlar qo‘riqlash xizmatlari samaradorligi va obyektlar xavfsizligini oshirish, jamoat tartibini mustahkamlash hamda zamonaviy raqamli texnologiyalar asosida nazoratni kuchaytirishga qaratilgani taʼkidlanmoqda.
.png "YouTube UZREPORT TV")
