Toshkentda 1 asrlik tarixga ega inshoot zamonaviy san’at markazi sifatida ochilmoqda
Uning tarixiy qiyofasi va industrial ruhi saqlagan holda, zamonaviy san’at, ta’lim, tadqiqot va madaniy muloqot markaziga aylantirildi. Markazda ko‘rgazma zallari, ta’lim va jamoat maydonlari, kutubxona hamda tadqiqot infratuzilmasi faoliyat yuritadi.
Joriy yil 6-sentabr kuni Toshkent zamonaviy san’at markazi — CCA Tashkent o‘z faoliyatini boshlaydi. Avvallari e'tibordan chetda qolgan ushbu 1 asrlik tarixga ega inshootga yangi hayot bag‘ishlangani, yirik madaniy loyiha bo'lgani juda quvonarli.
1912-yilda me’mor Vilgelm Geynzelman loyihasi bilan qurilgan ushbu bino dastlab tramvay deposi, keyinchalik, dizel elektr stansiyasi sifatida foydalanilgan. Bugun esa uning tarixiy qiyofasi va industrial ruhini saqlagan holda, zamonaviy san’at, ta’lim, tadqiqot va madaniy muloqot markaziga aylantirildi.
Fransiyaning mashhur Studio KO byurosi tomonidan ishlab chiqilgan arxitektura konsepsiyasi tarixiy meros va zamonaviy infratuzilmani uyg‘unlashtirgan. Markazda ko‘rgazma zallari, ta’lim va jamoat maydonlari, kutubxona hamda tadqiqot infratuzilmasi faoliyat yuritadi.
Eng muhimi — bu yerda nafaqat tarix saqlab qolindi, balki unga yangi mazmun berildi. Ilgari energiya ishlab chiqarilgan makonda bugun ijod, yangi g‘oyalar, san’at va insonlar muloqotining yangi energiyasi yuzaga keladi.
CCA Tashkent nafaqat Toshkentning, balki Markaziy Osiyoning yangi madaniy joziba nuqtalaridan biriga aylanishi kutilmoqda. Bu yerda zamonaviy san’at bilan bir qatorda ma’ruzalar, kinonamoyishlar, tadqiqotlar, munozaralar, konsertlar, performanslar va turli madaniy-ta’lim tadbirlari o‘tkaziladi.
.png "YouTube UZREPORT TV")
