Toshkentda bloger Ichki ishlar vaziri iste’fosini talab qilib, bir kishilik piket uyushtirdi

Bloger Shokir Sharipov O‘zbekiston ichki ishlar vaziri Po‘lat Bobojonov iste’fosini talab qilib, Toshkentdagi Gagarin haykali oldida bir kishilik piket uyushtirdi. Bu haqda BBC-o‘zbek xizmati xabar berdi.

Ichki ishlar idoralaridan fuqarolarning murdasi chiqayotgani Sharipovni tashvishga solgan. Qo‘qon shahar Ichki ishlar boshqarmasiga qarashli markazda 15 yashar bolaning urib o‘ldirilgani esa blogerni piket o‘tkazishga undagan asosiy omil bo‘lgan. 

"O‘zimning tanamda his qilishga harakat qilib ko‘rdim. Shundan keyin yegan ovqatim ba’zida tomog‘imdan o‘tmay qoldi. Agarda bunga hech kim jiddiy munosabat bildirmasa, har birimiz bilan yuz berishi mumkin deb o‘yladim… Ichki ishlar vazirligining isloh bo‘lmayotgani to‘g‘risida dalillari ko‘p. Biz ko‘ryapmizki, ichki ishlar ba’zi shaxslarga, guruhlarga xizmat qilayotgan bo‘lib qolyapti. Jamiyat bunga munosabatini bildirishi kerak", — deydi bloger.

Uning so‘zlariga ko‘ra, ayni paytda ichki ishlar tizimida haqiqiy islohotlar amalga oshirilgani yo‘q, aksincha, aholining sohaga nisbatan noroziligi tobora kuchayib bormoqda.

Sharipov so‘zida davom etarkan, bunday (o‘lim) holatlarda Ichki ishlar vaziri shaxsan odamlar bilan muloqot qilmayotgani sababli ham uning iste’fosini talab qilib chiqqanini aytgan. 

15 yashar bolaning o‘limi – bunda Ichki ishlar vaziri xalqdan uzr so‘rab, sohani isloh qilolmayotganini aytib, iste’fo berishi kerak edi. Nega mas’ullarni o‘zini boshqaning o‘rniga qo‘yish ko‘nikmasi yo‘q? Shu narsa meni hayron qoldiryapti. Bunaqa lavozimlarda empatiyasi kuchli, jamiyatning eng yaxshilari ishlashi kerak”,— degan fikrda Sharipov.

U nafaqat vazir Po‘lat Bobojonov, balki u rahbarlik qilayotgan tizim ham matbuotdan, jamoatchilikdan uzoqlashib ketganini aytadi. Qolaversa, odamlarning o‘zi befarq bo‘lgani va talab qilmayotgani uchun ham Ichki ishlar tizimidagi xatolar uchun xodimlar javobgarlikka tortilishi paysalga solib kelinmoqda. 

"chki ishlar tizimida bo‘layotgan voqealardan keyin ham Po‘lat Bobojonovga nisbatan ishonch bildirilayotgan bo‘lsa, davlat tepasida turgan barcha rahbarlarga nisbatan fuqarolarda juda yomon gumonlar uyg‘onib, shakllanib boryapti. Davlatning ustida turganlar xalqni bir tiyinga olmaydi, degan xulosalar mantiqan kelib chiqyapti. Modomiki, bu vazir ishdan olinmayaptimi, tepada qaror qabul qiluvchi rahbarlarda ‘xalq bu — bir poda, ular norozi bo‘lsa bo‘laversin, islohotlar asta-sekin bo‘laveradiʼ, mazmunida kayfiyat paydo bo‘lgan ekanda, degan xulosa kelib chiqadi. Omma aniq bir narsani bilmagani yoki vazirga nisbatan normal jazo qo‘llanilmayotgani uchun ham mantiqiy xulosalar shakllanib boradi", — deya ta’kidlaydi u.

Shokir Sharipovning ushbu harakatidan keyin, 23-noyabr kuni IIV matbuot kotibi Shohrux Gʻiyosov vazirlik ochiq muloqotga tayyorligini ta’kidlagan.

"BBC muxbiri tomonidan jamoatchilik faoli Shokir Sharipov bilan tashkil etilgan intervyudagi barcha savol va takliflari yuzasidan Ichki ishlar vazirligi ochiq muloqotga tayyor ekanligini ma’lum qilamiz", dedi G'iyosov.

Eslatib o'tamiz, Qo'qonda IIBga olib ketilgan 2007-yilda tug'ilgan bola vafot etgandi. So'ng Bosh prokuratura bolaning o‘limiga kim sababchi bo'lgani ochiqlagandi. Unga ko'ra, 2 nafar voyaga yetmagan tarbiyalanuvchi marhumni urib, o'ldirgani tasdiqlangan. Shu sababli, jinoyat ishi doirasida ushbu 2 nafar voyaga yetmagan tarbiyalanuvchi qamoqqa olinib, ichki ishlar xodimlariga nisbatan ham xizmat tekshiruvi tayinlangan. 

Shuningdek, 12-noyabr kuni bu bo'yicha Farg'ona viloyati IIB xabariga ko'ra, voqea sodir bo‘lgan kunda navbatchilik qilgan 2 nafar IIO xodimi tarbiyalanuvchilarni nazoratsiz qoldirib, janjalni oldini olmaganligi uchun, IIO safidan bo‘shatilib, xodimlarga nisbatan to‘plangan hujjatlar qonuniy chora ko‘rishlik uchun viloyat prokuraturasiga taqdim qilingan. Hozirda holat yuzasidan Ichki ishlar vazirligi tomonidan xizmat tekshiruvi olib borilmoqda.