Xorazm viloyat prokuraturasi Gurlan tuman hokimi o’rinbosarining vafoti bo’yicha tafsilotlarni ochiqladi
Avvalroq, Xorazm viloyati Gurlan tumani hokimi o‘rinbosari Umidjon Jumagaldiyevning baxtsiz hodisa oqibatida vafot etgani haqida xabar bergan edik. Xorazm viloyati prokuraturasi bu bo‘yicha batafsil ma'lumot berdi.
Aniqlanishicha, kecha, 17-mart kuni soat 01:30 larda Gurlan tumani hokimining o‘rinbosari Umidjon Jumagaldiyev Nexia 3 rusumli xizmat avtomashinasida Urganch tumani tomon harakatlanayotgan paytida bir yo‘nalishda kelayotgan yuk mashinasining orqa o‘ng g‘ildiragiga urilib, boshqaruvni yo‘qotgan va yo‘l chetidagi daraxtga borib urilgan.
U olgan tan jarohatlari oqibatida hodisa joyida vafot etgan. Hozirda ushbu YTH yuzasidan sud-tibbiy, sud-avtotexnika va sud-trasologik ekspertizalari tayinlangan.
Mazkur holat yuzasidan Urganch tuman prokuraturasi tomonidan tergovga qadar tekshiruv olib borilmoqda. Tekshiruv viloyat prokuraturasi tomonidan nazoratga olingan.
Ma’lumot o‘rnida, Umidjon Jumagaldiyev 1990-yilda Gurlan tumani Xazorasp qishlog‘ida tug‘ilgan, Toshkent davlat iqtisodiyot universitetini tamomlagan. 2021-yilda tuman hokimi o‘rinbosari etib tayinlangan.
.png "YouTube UZREPORT TV")
