Tennischimiz ishtirok etayotgan “Australian Open – 2025” mukofot puli rekord darajada oshdi

Xabaringiz bor, Avstraliyaning Melburn shahrida tennis bo‘yicha "Katta dubulg‘a" turkumiga kiruvchi Avstraliya ochiq chempionati bo‘lib o‘tmoqda.

Kuni kecha mazkur “Australian Open” turniri tashkilotchilari musobaqaning umumiy mukofot jamg‘armasini eʼlon qildi. O‘nga ko‘ra, turnirning umumiy mukofot jamg‘armasi o‘tgan yilgiga nisbatan 11,6 foizga oshib, 62,8 million AQSH dollariga yetgan. Shuni taʼkidlab o‘tish kerakki, bu ko‘rsatkich bugunga qadar o‘tkazilgan mazkur musobaqada qayd etilmagan va bu turnir tarixidagi rekord hisoblanadi. 

Chempionatning yakkalik bahslaridagi chempionlar 2 million 269 ming 340 AQSH dollari pul mukofoti bilan taqdirlansa, finalga qadar yetib kelgan tennischilar 1 million 214 ming 810 AQSH dollarga ega chiqadi. 

Ayni kunlarda o‘tayotgan saralash bosqich ishtirokchilarining har biri 21 ming 700, ikkinchi davrada esa 30 ming 380, uchinchi bosqichga yo‘l olsa 44 ming 630 AQSH dollari mukofot pulini qo‘lga kiritadi. 

Musobaqaning asosiy to‘riga yo‘l olgan raketka ustalari esa ilk davra uchun 82 ming 50 AQSH dollari bilan taqdirlanadilar va bu summa musobaqa finaliga qadar turli darajada oshib boradi. 

Eslatib o‘tamiz, “Australian Open – 2025” turnirida mamlakatimizning birinchi raqamli tennischisi Humoyun Sultonov saralash bosqichini muvaffaqiyatli boshladi va ilk davrada Daniel Elaxi Galanni yengib, ikkinchi bosqichda chexiyalik Dalibor Svrchina bilan to‘qnash keladigan bo‘ldi. Darvoqe, Humoyun ilk g‘alabasi evaziga 8 reyting ochkosi va 21 ming 700 AQSH dollari pul mukofotini qo‘lga kiritdi.