Daniya dron hodisalarini gibrid hujumlar deb atadi

Daniya hukumati yaqinda mamlakat aeroportlarida uchuvchisiz uchishlarni gibrid hujumlar sifatida baholamoqda. Bu harakatlardan maqsad “qo‘rquv ekish”dir, dedi 25-sentabr, payshanba kuni Adliya vaziri Piter Xummelgaard. Uning ta’kidlashicha, bunday hodisalar xavfi saqlanib qoladi va shu sababli hukumat dronlarni aniqlash va zararsizlantirish uchun yangi texnologiya sotib oladi hamda muhim infratuzilma operatorlariga dronlar urib tushirishga ruxsat beruvchi qonunchilikni joriy qiladi.

Daniya mudofaa vaziri Troels Lund Poulsen hujumlar ortida "professional aktyor" turganini ta'kidladi. Mamlakatga to‘g‘ridan-to‘g‘ri harbiy tahdid yo‘q.

Havo hududining buzilishi

Payshanba kuni erta tongda Daniya gʻarbidagi bir qancha aeroportlar soatlab toʻxtatilganidan soʻng oʻz faoliyatini qayta tikladi. Kelib chiqishi noma’lum bo‘lgan dronlar avvalroq mamlakatning ikkinchi yirik aeroporti Billund va aeroportdan harbiy maqsadlarda ham foydalaniladigan Olborg yaqinidagi havo hududini buzgan edi. Billundda parvozlar bir soatga, Olborgda esa uch soatga to'xtatildi.

Politsiya ma'lumotlariga ko'ra, dronlar shu hafta boshida Kopengagen aeroportini deyarli bir kun davomida falaj qilgan voqeaga o'xshash sxema bo'yicha harakat qilgan. Bir qator harbiy obyektlarda ham hodisalar qayd etilgan.

Daniya mudofaa vazirining qayd etishicha, Rossiya bilan aloqadorlik haqida hech qanday dalil yo‘q. Rossiyaning Kopengagendagi elchisi ham Moskvaning ishtirokini rad etdi. Daniya maslahatlashuvlar uchun NATO va YeI bilan bog‘landi, biroq Shimoliy Atlantika shartnomasining 4-moddasi bo‘yicha munozaralarni boshlash to‘g‘risida hali qaror qilgani yo‘q.