Hamas uch nafar isroillik garovga olingan ayolni Qizil Xochga topshirdi

Falastinning Hamas tashkiloti Isroil bilan o‘t ochishni to‘xtatish kelishuvining birinchi bosqichini amalga oshirish doirasida 19 yanvar, yakshanba kuni kechqurun Xalqaro Qizil Xoch qo‘mitasiga garovga olingan uch ayolni topshirdi. Ular 24 yoshli Romi Gonen, 28 yoshli Emili Damari va 31 yoshli Doron Shtaynbrexer ekanligi aniqlanib, G‘azo shahri markazida XQXK vakillariga topshirildi, deb yozadi The Times of Israel.

Gonen Nova musiqa festivalidan, Damari va Shtaynbrexer Kfar-Aza kibutsidagi uylaridan o‘g‘irlab ketilgan. Bayonotda aytilishicha, Isroil Mudofaa armiyasi (TSAHAL) Qizil Xoch qo‘mitasi garovdan ozod qilinganlar qo‘lida ekanligini va ular Isroil harbiylariga topshirilishini tasdiqlagan. Isroil bosh vaziri Binyamin Netanyahu idorasiga ko‘ra, yaqin yetti kun ichida yana to‘rt nafar ayol ozod etilishi kutilmoqda.

The Jerusalem Post nashrining yozishicha, garovga olingan uch nafar isroillik bo‘lgan Qizil Xoch avtomobili Isroil chegarasini kesib o‘tgan. Gazeta xabariga ko‘ra, G‘azo shahri markazidagi maydonda XQXK mashinasini olomon o‘rab olgan, Hamas jangchilari ular yo‘lga chiqishi uchun uni tarqatishga majbur bo‘lgan.

Isroil 90 nafar falastinlik mahbusni ozod qildi

Isroil Hamas harakati bilan G‘azo sektorida o‘t ochishni to‘xtatish bo‘yicha kelishuv doirasida 90 nafar falastinlik mahbusni qamoqdan ozod qildi, deb xabar bermoqda Reuters 20 yanvarga o‘tar kechasi falastinliklar ozod etilgan Isroil qamoqxona xizmatiga tayanib. Bu ma’lumotni AFP agentligi jurnalistlari tasdiqladi.

So‘nggi ma’lumotlarga ko‘ra, oynalari qoraytirilgan ikkita avtobus Iordan daryosining g‘arbiy sohilida joylashgan Ofer harbiy qamoqxonasi hududidan chiqib ketgan.

The Times of Israel nashrining yozishicha, gap G‘arbiy Sohilning 78 nafar va Sharqiy Quddusning 12 nafar fuqarosi haqida ketyapti. Ynet portali ma’lumotlariga ko‘ra, ular orasida 69 nafar ayol, jumladan, bir nafar voyaga yetmagan qiz, 8 nafar voyaga yetmagan o‘g‘il bola va 12 nafar erkak nisbatan kichik jinoyatlar uchun sudlangan.