Havo sharidan uchiriladigan dunyodagi birinchi ko'rinmas dron taqdim etildi

Landing Zones Canada kompaniyasi dunyodagi birinchi ko‘rinmas dron — Eagle APDS’ni taqdim etdi. Dron stratosfera balandligiga erishish uchun havo sharlaridan foydalanadi. Ushbu innovatsion qurilma deyarli ko‘zga tashlanmaydigan texnologiyalar, yuqori samaradorlik va keng imkoniyatlarni o‘zida mujassam etgan, u harbiy operatsiyalar yo‘nalishini tubdan o‘zgartirishi mumkin.

Eagle APDS o‘zining noyob uchirish tizimi bilan an’anaviy dronlardan farq qiladi. U standart parvoz usullari o‘rniga havo shari yordamida osmonga ko‘tariladi, bu esa unga ilgari yetib borilmagan balandlikka chiqish imkonini beradi.

Eagle’ning asosiy xususiyatlaridan biri uning o‘zgaruvchan qanotidir, ular yordamida tovushdan tez uchayotgan dron qisqa fursatda sekinlashishi mumkin. Bunday moslashuvchanlik uni strategik vazifalardan tortib taktik yordamgacha bo‘lgan turli xil vazifalarni bajarish uchun universal vositaga aylantiradi.

Eagle APDS ham to‘liq avtonom, ham operator boshqaruvi ostida uchadi. Bu, ayniqsa, vaziyatga qarab talablar o‘zgaradigan harbiy operatsiyalar uchun juda muhim.

Stratosferada ishlashga mo‘ljallangan Eagle uchirish nuqtasidan yuzlab kilometr uzoqlikdagi vazifalarni bajarish qobiliyatiga ega, shu sababdan u uzoq muddatli missiyalarga juda mos. Yaqinda o‘tkazilgan sinovlar hatto eng qiyin iqlim sharoitlarida ham dronning ishonchliligi va samaradorligini tasdiqladi.

Eagle konstruksiyasi maxfiylikka e’tibor qaratadi. Dron minimal radar signaturasiga ega bo‘lib, dushman tizimlari uni payqashi ehtimoli kam. Natijada dron dushman havo hududidagi vazifalarni muvaffaqiyatli bajarishi mumkin.

“Eagle harbiy dronlar texnologiyasida yangi mezon o‘rnatmoqda. Uning turli xil foydali yuklarni ko‘tara olish va og‘ir sharoitlarda samarali ishlash qobiliyati dronni butun dunyo bo‘ylab harbiy operatsiyalarda qo‘llash uchun ajoyib tanlovga aylantirmoqda”, — dedi Landing Zones Canada Inc kompaniyasining asoschisi va bosh direktori Spens Freyzer.