Isroil HAMAS garovdagilarni ozod qilmasa, G‘azoga zarba berish bilan tahdid qildi

Isroil mudofaa vaziri Isroil Kats Falastinning HAMAS harakati tomonidan o‘qqa tutilgan Netivot shahriga tashrifi chog‘ida, agar harakat garovga olinganlarni ozod qilishni ta’minlamasa va Isroil hududini o‘qqa tutishni to‘xtatmasa, G‘azoga kuchli zarbalar berish bilan tahdid qildi.

“Agar HAMAS garovdagilarning ozod etilishini ta’minlamasa va tez orada Isroilni o‘qqa tutishni to‘xtatmasa, G‘azo uzoq vaqtdan beri ko‘rmagan kuchli zarbalarga duchor bo‘ladi”, deydi mudofaa vaziri.

HAMAS bilan garovga olinganlarni ozod qilish bo‘yicha birinchi kelishuv amalga oshirilganidan beri bir yildan ko‘proq vaqt o‘tdi va shundan beri tomonlar vositachilar orqali qolgan garovga olinganlarning taqdiri bo‘yicha turli darajadagi shiddat bilan muzokaralar olib bormoqda. Oxirgi haftalarda Qohira va Dohada vositachilik asosidagi muzokaralar faollashdi, xabardor manbalar ijobiy natijalarga erishilayotganini ma’lum qilgan.

2024-yilning 21-dekabr kuni Falastin tomonining muzokaralar ishtirokchisi garovga olinganlar masalasi bo‘yicha kelishuv va o‘t ochishni to‘xtatish bo‘yicha muzokaralar 90 foizga yakunlanganini ma’lum qilgan edi. Avvalroq Livanning Al-Mayadin telekanali HAMAS kelishuv bo‘yicha birinchi bosqichda 34 nafar garovga olinganlarni ozod qilishi mumkinligini bildirgan.

Isroil esa bu davrda barcha garovga olinganlar ozod etilishi kerakligini talab qilmoqda — G‘azoda 101 nafar isroillik garovga olingan, ulardan 40 ga yaqini halok bo‘lgan deb taxmin qilinmoqda.

The National nashrining aniqlik kiritishicha, Isroil birinchi bosqichda o‘z qamoqxonalarida uzoq vaqtdan buyon qamoq muddatini o‘tayotgan 200 nafar falastinlikdan 70 nafarini ozod qilishdan bosh tortmoqda. HAMAS esa ming nafar mahbusni ozod qilishga erishmoqchi edi. Buning evaziga harakat rasmiylari 60 kunlik sulh davomida har 48 soatda bittadan, jami 20-30 nafar garovga olinganlarni ozod etishni va’da qilmoqda.