Robot `Fukusima` AESda eritilgan yoqilg`ini tasvirga oldi

Suvga cho`ktirilgan `Fukusima` AESning avariya reaktorini tadqiq qilgan suvosti roboti olgan videokadrlarda lava bo`laklariga o`hshash jismlar tasvirga muhrlangan. Atomchi mutahassislar bu to`q sariq rangdagi quyqalar yadroviy yoqilg`ining qoldiqlari bo`lishi mumkin degan g`oyani ilgari surmoqda. 2011 yilning martida ro`y bergan avariyada issiqlik ajratuvchi sterjenlar erib ketgan va keyin esa sovigan bo`lishi mumkin. Agar tahminlar tasdig`ini topsa, bu 1986 yilgi Chernobyl' fojeasidan keyingi eng yirik avariya oqibatlarini bartaraf etishdagi muhim bosqich bo`ladi. Yoqilg`ining radioaktiv qoldiqlarining topilishi TEPCO kompaniyasiga erib sovigan sterjenlarni ajratib olish uslublarini ishlab chiqishda yordam beradi. Bu ishning amalga oshirilishi hamda yaqin atrofdagi hududni zararsizlantirish yana bir necha o`n yillarni talab etadi, dedi mutahassislar. Operator kompaniya vakilining so`zlariga ko`ra, hozircha robot tomonidan topilgan ob`ektlar yadro yoqilg`isining qoldiqlariga ega, deb ishonch bilan aytish qiyin. `Fukusima` AESdagi avariya 2011 yilning 11 martida kuchli zilziladan keyin sodir bo`lgan tsunami oqibatida ro`y bergan edi. Tabiiy ofat natijasida qariyb 16 ming nafar odam halok bo`lgandi. Stansiyadagi fojeaga Yadroviy voqealar xalqaro shkalasi bo`yicha yettinchi – eng yuqori daraja berilgan edi. Robot suv ostidagi radioaktiv gazlarning oqib ketishini oldini oluvchi quvur orqali reaktornig bir qismiga kirgan edi.