Tojikistonning sobiq tashqi ishlar vaziri 27 yilga qamaldi

Tojikiston Oliy sudi «davlat to‘ntarishiga urinish» ishi bo‘yicha hukm chiqardi. Ayblanuvchilar, jumladan, sobiq tashqi ishlar vaziri Hamroxon Zarifiy 18 yildan 27 yilgacha qamoq jazosiga hukm qilindi, deb xabar berdi Asia-Plus.

Eng uzoq muddat - 27 yillik qamoq jazosi sobiq vazir Zarifiyga, shuningdek, parlamentning sobiq deputati va Tojikiston demokratik partiyasi raisi Saidjafar Usmonzodaga berildi. Sud Demokratik partiya raisining sobiq o‘rinbosari, jurnalist Ahmadshoh Komilzodani 18 yilga, Sotsial-demokratik partiya raisi o‘rinbosari, huquqshunos Shokirjon Hakimovni 18 yilga, jurnalist va Shokirjon Hakimovning jiyani Ruxshona Hakimovani 8 yilga ozodlikdan mahrum qildi.

Tojikistonda amaldorlarni bu ish bo‘yicha hibsga olish 2024 yil iyun oyida boshlangan edi. Rasmiylar tergov bo‘yicha ma’lumot bermadi, sud mahkamalari yopiq eshiklar ortida o‘tdi.

Qayd qilinishicha, sudlanuvchilarning aksariyati «Davlatga xiyonat» va «Hokimiyatni egallash», ba’zilari «Firibgarlik», «Milliy, irqiy, mahalliy yoki diniy adovatni qo‘zg‘atish» moddalari bilan ayblangan. Ayblanuvchilar o‘z aybini tan olmagan va suddan oqlashni so‘ragan.

76 yoshli Hamroxon Zarifiy 2006-2013 yillarda Tojikiston tashqi ishlar vaziri bo‘lib ishlagan.