Tramp Eronning Qatardagi AQSh bazasiga hujumini «juda zaif» deb atadi

Eron AQShning o‘z yadroviy inshootlarini yo‘q qilishiga «juda zaif javob» berdi. Bu javob Vashington tomonidan kutilgan edi va u «juda samarali» qaytarildi. Amerika prezidenti Donald Tramp shu so‘zlar bilan 23 iyun, dushanba oqshomida Truth Social ijtimoiy tarmog‘ida Islom Respublikasining Qatardagi AQShning Al-Udeyd aviabazasiga uyushtirgan hujumiga izoh berdi.

Trampning so‘zlariga ko‘ra, bazaga 14 ta raketa uchirilgan: ulardan 13 tasi urib tushirilgan, yana biri havo hujumidan mudofaa kuchlari tomonidan «o‘tkazib yuborilgan», chunki u «xavfsiz yo‘nalishda» uchgan.

«Birorta amerikalik jabrlanmagani va deyarli hech qanday zarar ko‘rmagani haqida xabar berishdan mamnunman», — deya qo‘shimcha qildi Tramp. Shu bilan birga, u Eronga hujum haqida erta ogohlantirgani uchun minnatdorchilik bildirdi. «Balki Eron mintaqada tinchlik va hamjihatlik sari intilishi mumkindir va men Isroilni ham shunday qilishga undashdan xursandman», dedi AQSh prezidenti.

Ayni paytda, Qatar Eronning harakatlarini izohlar ekan, Islom Respublikasining amirlik hududida joylashgan AQSh bazasiga hujumiga javob berish huquqini o‘zida saqlab qolishini bildirdi. «Ikki davlat (Eron va Qatar) va ikki xalq o‘rtasida chuqur aloqalar mavjud, biroq hujum, albatta, haqiqiy uchrashuv va aniq pozitsiyani talab qiladi», — deya Qatar TIV matbuot kotibi Majid bin Muhammad al-Ansoriy so‘zlaridan iqtibos keltiradi Reuters.

Avvalroq u Qatar havo hujumiga qarshi mudofaa tizimi Islom Respublikasining «hujumini muvaffaqiyatli qaytargani» va Eron raketalarini tutib olganini ma’lum qilgandi.

O‘z navbatida, Eron tashqi ishlar vaziri Abbos Arag‘chi Telegramʼda Tehronning Qatardagi AQShning Al-Udeyd bazasiga hujumi «AQShning Eron hududiy yaxlitligi va suverenitetiga qarshi tajovuzkorligiga javob» ekanini ta’kidladi.

Xabar e’lon qilingan vaqtga kelib Qatar Eronning AQSh bazasiga hujumi ortidan yopilgan havo hududini ochgan.