Yaponiyada meteorologik kuzatuvlar tarixida rekord miqdordagi qor yog‘di

Yaponiya hukumati bosh kotibi Yesimasa Hayasining ma’lumotlariga ko‘ra, qor yog‘ishi oqibatida bir kishi — 80 yoshli ayol vafot etdi. U qor tozalash paytida yiqilgan. To‘rt kishi og‘ir ahvolda, yana besh kishi yengil tan jarohati olgan. Ularning aksariyati muzlagan yo‘laklarda sirpanib yiqilgan.

Binolarga zarar yetdi, 790 ga yaqin uy elektr ta’minotisiz qoldi.

Hokkaydo prefekturasida 130 dan ortiq ichki reyslar bekor qilindi. Bundan tashqari, Tohoku, Hokuriku va boshqa mintaqalardagi aeroportlar faoliyat ko‘rsatmayapti. Yaponiya hukumati vaziyat rivojlanishini sinchkovlik bilan kuzatib bormoqda va favqulodda xizmatlar harakatlarini muvofiqlashtirmoqda.

Livedoor News portali xabariga ko‘ra, 5 fevral kuni ertalab qor yog‘ishi va yo‘llarning muzlashi oqibatida 83 ta yo‘l-transport hodisasi sodir bo‘lgan. Xodimlar ishga kela olmagani va tovarlarni yetkazib berish jadvallari buzilgani sababli 370 ga yaqin maktab va do‘konlar yopilgan.

Yaponiyaning ayrim hududlarida seshanba kuni rekord darajada — 129 santimetr qor yog‘di, boshqa joylarda esa qor qatlamining balandligi 130 santimetrdan oshib ketdi. Mamlakat meteorologiya xizmatining ma’lumotlariga ko‘ra, past bosim hafta oxirigacha qor bo‘ronlarini keltirishda davom etadi. Yog‘ingarchilik bilan birga sekundiga 25 metrgacha yetadigan kuchli shamol esmoqda.