Deputatlar davlat mudofaa buyurtmasi to‘g‘risidagi qonunni qabul qildi

Oliy Majlis Qonunchilik palatasi 20-avgust kuni bo‘lib o‘tgan majlisda «Davlat mudofaa buyurtmasi to‘g‘risida»gi qonunni uchinchi o‘qishda qabul qildi.

Qonun loyihasi "maqsad va vazifalarni belgilash, uni shakllantirish va amalga oshirish sohasidagi munosabatlarni tartibga solishning yagona huquqiy mexanizmini yaratish, davlat organlarining vakolatlarini aniqlashtirish va ularning o‘zaro munosabatlarini tartibga solish zarurati"dan kelib chiqqan holda ishlab chiqilgan.

Hujjat xavfsizlikni taʼminlash, favqulodda vaziyatlarning oldini olish va bartaraf etish bilan bog‘liq davlat mudofaa buyurtmasi masalalari bo‘yicha munosabatlarni tartibga solishga qaratilgan, deyiladi xabarda.

Qonun loyihasida davlat mudofaa buyurtmasi sohasidagi asosiy tushunchalar, maqsad va vazifalar, sohani davlat tomonidan tartibga solish, davlat mudofaa buyurtmasini shakllantirish va amalga oshirish, maxfiylik tartib-taomillarini belgilash nazarda tutilgan.

Hujjatni ishlab chiqish prezidentning 2023 yil 31 yanvardagi farmonida nazarda tutilgandi. Mudofaa vazirligi huzuridagi Mudofaa sanoati agentligiga qonun loyihasini ishlab chiqib, 1 martga qadar Vazirlar Mahkamasiga kiritish topshirilgan.

Farmonga ko‘ra, mudofaa buyurtmasini ko‘rib chiqish va tasdiqlash O‘zbekiston Qurolli kuchlarini jihozlash bo‘yicha davlat komissiyasi tomonidan amalga oshiriladi. Davlat mudofaa buyurtmasi doirasida xorijda ishlab chiqariladigan harbiy va ikki maqsadli mahsulotlarni (ishlarni, xizmatlarni) xarid qilish (import qilish) bo‘yicha yagona agent etib “O‘ztextreyd” davlat unitar korxonasi belgilangan.