Markaziy Osiyoda ekologik maqsadlarga erishish uchun moliyalashtirish va investitsiyalarni oshirishga e'tibor qaratildi

11-mart kuni Toshkentda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, Germaniyaning Atrof-muhit, tabiatni muhofaza qilish, yadroviy xavfsizlik va iste'molchilar huquqlarini himoya qilish federal vazirligi (BMUV), Yevropa tiklanish va taraqqiyot banki (YeTTB) va Iqtisodiy hamkorlik va taraqqiyot tashkiloti (OECD) ishtirokida “Yuqori darajadagi siyosiy muloqot: Markaziy Osiyoda ekologik maqsadlarga erishish uchun moliyalashtirish va investitsiyalar hajmini oshirish” mavzusiga bag‘ishlangan tadbir o‘tkazildi.

Tadbirda Ekologiya, atrof-muhitni muhofaza qilishva iqlim o‘zgarishi vaziri Aziz Abduhakimov, Germaniyaning O‘zbekistondagi elchisi Manfred Xyuterer, OECD direktorining atrof-muhit bo'yicha o'rinbosari Matilda Mesnard, Bosh direktor oʻrinbosari, Iqlim oʻzgarishiga moslashish va tabiat bilan bog‘liq faoliyatni moliyalashtirish (YeTTB) masalalari bo‘yicha rahbar Rakel Barza, Markaziy Osiyo davlatlari va Mo'g'ulistonning atrof-muhitni muhofaza qilishidoralari, xalqaro institutlar vakillari va boshqalar ishtirok etdi.

Tadbirning ochilishida Aziz Abduhakimov joriy yil doirasidagi muloqot kun tartibining dolzarbligini ta’kidladi.

“Prezident Shavkat Mirziyoyev tashabbusi bilan 2025-yilning “Atrof-muhitni asrash va “yashil iqtisodiyot” yili” deb e’lon qilingani O‘zbekistonning barqaror rivojlanishga intilishi va tabiatni asrab-avaylashga intilishidan dalolatdir. Tabiatni muhofaza qilish nafaqat katta moliyaviy resurslarni, balki milliy va mintaqaviy darajadagi barcha tomonlarning faol, muvofiqlashtirilgan ishtirokini ham talab qilishini barchamiz tushunamiz. Ekologiyani asrash bo‘yicha Markaziy Osiyo hamkorligi mintaqamizning uzoq muddatli barqaror rivojlanishi va ekologik xavfsizligini ta’minlaydigan bilim almashish, investitsiyalarni jalb qilish va ekologik yechimlarni amalga oshirish uchun muhim platformaga aylanishiga ishonamiz”, — dedi vazir.

Muloqot davomida ishtirokchilar suv, energetika va yer resurslari xavfsizligini ta’minlash, shuningdek, biologik xilma-xillik va tabiatni muhofaza qilish kabi yetarli darajada moliyalashtirilmagan ekologik hududlarning moliyaviy jozibadorligini oshirish bilan bog‘liq bir qator asosiy vazifalarni ko‘rib chiqdilar. Shuningdek, quyidagi asosiy mavzular muhokama qilindi: chuchuk suv ekotizimlarida suv isrofgarchiligiga yo’l qo’ymaslik, turli sohalarda suv samaradorligini oshirish va ifloslanishga qarshi nazoratni yaxshilash uchun eng yaxshi texnologiyalarni joriy etish, tabiatga asoslangan yechimlarni ishlab chiqish, jumladan, suv toshqinlarini boshqarish va barqaror qishloq xo'jaligi.

Muhokamalar chog‘ida ishtirokchilar strategik ustuvor yo‘nalishlarni belgilab oldilar va turli moliya institutlari qanday qilib samaraliroq hamkorlik qilishlari, jumladan, gibrid moliyaviy vositalardan foydalanish, bunday loyihalarning tavakkal va foyda nisbatini yaxshilash bo‘yicha fikr almashdilar. Ushbu masalalarni milliy va mintaqaviy darajada muvofiqlashtirishni kuchaytirish imkoniyatlari va afzalliklari ham muhokama qilindi.

Bundan tashqari, tadbirda yangi tashkil etilgan “Tabiat masalalari bo‘yicha Markaziy Osiyo hamkorligi” dasturi taqdimoti boʻlib oʻtdi. Yevropa tiklanish va taraqqiyot banki (YeTTB) tomonidan boshqariladigan jamg‘arma Markaziy Osiyoda tabiiy resurslar yo‘qotilishini kamaytirish, biologik xilma-xillikni oshirish va iqlim o‘zgarishiga chidamlilikni oshirish bo‘yicha keng ko‘lamli harakatlar uchun ko‘rgazmali loyihalar yaratish orqali yashil investitsiyalar va tabiatga ijobiy biznes strategiyalari bo‘yicha ambitsiyalarni oshirishga qaratilgan.