O‘zbekiston va Qozog‘iston chegarasida “Qoplonbek” va “Navoiy” nazorat-o‘tkazish punktlari ochildi

O‘zbekiston va Qozog‘iston chegarasida “Qoplonbek” va “Navoiy” nazorat-o‘tkazish punktlari ochildi, biroq ular cheklovlar bilan ishlaydi. Bu haqda Qozog‘iston Moliya vazirligining Davlat daromadlari qo‘mitasi matbuot xizmati ma’lum qildi. 

Qozog‘iston  Davlat daromadlari qoʻmitasining tushuntirishicha, Oʻzbekiston tomoni tez orada modernizatsiya qurilish ishlarini yakunlash uchun “Gʻishtkoʻprik” nazorat-oʻtkazish punktini (Jibek yoʻlining Qozogʻiston tomonidagi tutash oʻtkazish punkti) vaqtincha yopadi.

Shu bois davlatlar kelishuvga koʻra, jismoniy shaxslarning piyoda oʻtishlari, yoʻlovchi transporti va avtobuslar oʻtishi uchun “Qoplonbek” (Qozogʻiston tomonida) va “Navoiy” (Oʻzbekiston tomoni) nazorat-oʻtkazish punktlarini ochishga kelishib oldilar.

“O‘zbekiston va Qozog‘iston tomonlari “Qoplanbek” va “Navoiy” nazorat-oʻtkazish punktlarida bir vaqtning oʻzida modernizatsiya va texnik qayta jihozlash ishlarini amalga oshirdi va bugun ushbu oʻtkazish punktlarining texnik ochilishi amalga oshirildi.

Foydalanishga topshirish ishlari munosabati bilan 27-yanvardan 5-fevralgacha jismoniy shaxslar, yoʻlovchi tashish transporti va avtobuslarning oʻtishi cheklangan miqdorda amalga oshiriladi. 5-fevraldan nazorat-o‘tkazish punkti to‘liq quvvat bilan ishlaydi”, — deyiladi Davlat daromadlari qo‘mitasi xabarida.

Keyinchalik, tomonlarning kelishuvidan so'ng, ikkinchi bosqich ushbu nazorat punktlarida yuk tashish vositalarining o'tishi bo'ladi.

Qo‘mita qo‘shimcha qilganidek, “Qoplonbek” nazorat-o‘tkazish punkti jismoniy shaxslarni 20 mingtaga, avtotransport vositalarini kuniga 800 tagacha avtomobil o‘tkazish imkoniyatini oshirishi kutilmoqda.

Eslatib o'tamiz, bundan oldin O‘zbekiston tomonining tashabbusi bilan "G‘ishtko‘prik" nazorat-o‘tkazish punkti (Qozog‘iston tomonida "Jibek yoʻli" punkti) vaqtincha yopilishi haqida xabar bergan edik. Bu ushbu nazorat-o‘tkazish punktida olib borilayotgan modernizatsiya qilish ishlarining yakunlanishi bilan bog‘liq.