Qishloq joylaridagi sanoat zonalari hamda konlar va karyerlar uchun yer soligʻi 10 baravargacha kamaytiriladi - prezident

Bu haqda Mahalliy sanoatni rivojlantirish bo'yicha dolzarb vazifalarni belgilab olishga bag'ishlangan prezident boshchiligida navbatdagi videoselektorda ma'lum qilingan. 

Unda viloyat hokimlari 24 ta tumanni qurilish materiallari ishlab chiqarishga ixtisoslashtirish boʻyicha oʻz takliflarini bergani aytilmoqda. 

Bunda, qurilish materiallari klasterlarini, eng avvalo, yirik korxonalar va mavjud infratuzilmaga yaqin hududlarda joylashtirish zarurligi ham ta'kidlangan. 

"Misol uchun, Chust, Forish, Qorovulbozor, Sherobod tumanlaridagi sement zavodlari, Oʻzbekiston tumanidagi noruda konlari infratuzilmasidan foydalanib, bunday klasterlarni tashkil etish kerak.Umuman, 24 ta tumanda infratuzilmani yaxshilash uchun byudjetdan qoʻshimcha 400 milliard soʻm, geologiya ishlarini amalga oshirishga 100 milliard soʻm ajratiladi”,- degan prezident.

Bundan tashqari, davlat rahbari viloyatlar tomonidan qurilish materiallari sohasida 5 milliard dollarlik 1 mingdan ziyod loyiha takliflari shakllantirilganini aytgan.

Viloyat hokimlari, yil yakuniga qadar 900 ta loyihani ishga tushirish orqali 25 mingta ish oʻrni yaratishga masʼul boʻlishi talab etilgan. 

"Annaqlichev qurilish materiallari ishlab chiqarish loyihalari uchun 300 million dollar mablagʻlar jalb qilsin. Bunga qoʻshimcha, loyihalarni kreditlashga davlat tomonidan Sanoatqurilishbank orqali qoʻshimcha 200 million dollar ajratiladi.

Yangi turdagi qurilish mahsulotlari ishlab chiqarish uchun, tadbirkorlarga 15 milliard soʻmgacha kafillik beriladi (hozirda 8 milliard soʻm).",- degan Shavkat Mirziyoyev.

Milliy valyutadagi kreditlar boʻyicha Markaziy bank stavkasidan 10 foizgacha ortiq qismi va xorijiy kreditlar boʻyicha, foiz stavkasining 50 foizi qoplab berilishi ma'lum qilinmoqda. 

Qolaversa, qishloq joylaridagi sanoat zonalari hamda konlar va karyerlar uchun yer soligʻi 10 baravargacha kamaytiriladi, deyiladi xabarda.