O‘zbekistonliklar sentabrda go‘sht, sut va yoqilg‘i narxlari oshishini ko‘proq sezishgan
Markaziy bank sentabr oyi uchun aholi va tadbirkorlik subyektlari tomonidan sezilgan inflatsiya darajasi oid so‘rovnoma natijalarini e’lon qildi.
Unga ko‘ra, aholi tomonidan sezilgan inflatsiya darajasi 13,4 foizni tashkil qilgan. Hududlar kesimida inflatsiyaning eng yuqori darajasi Toshkent shahri (15,4 foiz) va Andijon viloyatida (14,6 foiz), eng past darajasi esa Farg‘ona (12,1 foiz) va Navoiy viloyatlarida (12,2 foiz) sezilgan.
So‘rovnomada qatnashganlarning katta qismi go‘sht va sut hamda benzin va yoqilg‘i narxi yuqori darajada o‘sganini ta’kidlagan.
Shuningdek, oy davomida dorilar (29 foiz) va ijara haqi (18 foiz) narxlarida yuqori darajada o‘sishni sezganlar ulushi ko‘paygan.
Daromadlari 5 mln so‘m va undan yuqori daromad topadigan aholi tomonidan sezilgan inflatsiya darajasi respublika bo‘yicha o‘rtacha ko‘rsatkichdan yuqori darajada shakllangan. Xususan, 15 mln so‘mdan ko‘p daromad egalari sezgan inflatsiya 15,4 foizni tashkil qilgan. Daromadi 2 mln so‘mgacha bo‘lgan respondentlarga esa inflatsiya nisbatan kamroq sezilgan – 12,8 foiz.
Surxondaryo va Andijon viloyatlarida 17 foiz va undan yuqori inflatsiya sezayotganlar ulushi 35 foizga, Toshkent shahrida esa 33 foizga yetgan.
.jpg "X factor uzbekistan")
.png "YouTube UZREPORT TV")
