Senat kafolatlangan omonatlarni 200 mln so‘mgacha cheklashga qaratilgan qonunni ma’qulladi

Oliy Majlis Senatining uchinchi yalpi majlisida “Banklardagi omonatlarni himoyalash kafolatlari to‘g‘risida”gi qonun ko‘rib chiqildi.

Mazkur qonunda kafolatlash hodisasi va obyekti, kafolatlangan omonat, kafolatlangan omonatlar bo‘yicha kompensatsiya to‘lash kabi tushunchalar ochib berilgan.

Qonun bilan banklardagi omonatlarning himoya qilinishini kafolatlash sohasidagi vakolatli organ – Omonatlarni kafolatlash agentligining huquqiy maqomi, huquq va majburiyatlari va uning faoliyat ko‘rsatish tartibi belgilanmoqda.

Shuningdek, kafolatlash hodisasi ro‘y berganda Omonatlarni kafolatlash agentligi tomonidan  bir omonatchiga har bir bankda kafolatlash obyektining qoldig‘i 200 mln so‘m miqdorida yoki undan kam bo‘lsa to‘liq hajmda kompensatsiya to‘lanishi belgilab qo‘yilmoqda.

Bank tugatilganda omonatchilarga agentlik tomonidan kompensatsiya to‘lovini amalga oshirish davri bosqichma-bosqich 7 ish kunigacha qisqartirilishi nazarda tutilmoqda. Jumladan,  bank tugatilganda kompensatsiya to‘lovi 2025-yil 1-yanvardan boshlab 20 ish kuni, 2026-yil 1-yanvardan 15 ish kuni, 2027-yil 1-yanvardan 7 ish kuni mobaynida amalga oshiriladi.

Foto: Oliy Majlis Senati matbuot xizmati

Bank bankrotlikka uchragan taqdirda, omonatchilar mablag‘larining agentlik tomonidan qoplab berilishini inobatga olib, omonatchining bankdan talab qilish huquqi agentlikka o‘tkazilmoqda.

Qonunning qabul qilinishi bank tizimi barqarorligini mustahkamlash yo‘li bilan aholi va tadbirkorlarning mablag‘lari but saqlanishi hamda kafolatlash hodisasi ro‘y berganda omonatchilarga mablag‘lar qisqa muddatlarda to‘lab berilishi taʼminlanishiga xizmat qiladi.

Muhokamadan so‘ng mazkur qonun senatorlar tomonidan maʼqullandi.

Eslatib o'tamiz, bundan oldin Markaziy bank 16 ta tijorat bankini jarimaga tortgani haqida xabar bergan edik. O‘rganish davomida banklar tomonidan taklif etayotgan kredit va omonatlar haqidagi axborotlar iste’molchilarga qonunchilikda belgilangan tartibda oshkor qilinishi hamda bank kartalari orqali xizmatlar ko‘rsatilishi to‘liq yo‘lga qo‘yilmaganligi holatlari aniqlangan. 

Maqola muallifi: I. Farhodova