“Tashabbusli budjet” loyihasining 1-mavsumida 1666 ta taklif g‘olib deb topildi

Bugun, 7-aprel kuni soat 10:00 da “Tashabbusli budjet” loyihasining 2023-yilning 1-mavsumi yakunlandi.

18-mart kuni boshlangan ovoz berish bosqichi yakunlariga ko‘ra, mamlakat bo‘ylab jami 33 680 ta taklifdan 1 666 tasi g‘olib deb topildi. Bu o‘tgan mavsumdagi tasdiqlangan (1 418) takliflardan 248 taga ko‘p.

Loyiha saytida ma’lum qilinishicha, ushbu takliflarni amalga oshirish uchun bu yil 1,57 trln so‘m mablag‘ ajratiladi.

Aytib o’tish lozim, g’olib bo’lgan tashabbuslar ichida eng ko’p ovozni Qashqadaryo viloyati, Yakkabog‘ tumani, Darxon MFY, Butasoy qishlog‘ining 2,5 km yo‘lini asfalt qilish loyihasi to’plagan. Ushbu tashabbus uchun 25728 ta ovoz berilgan. Loyihaga 1,2 mlrd so’m mablag’ ajratilishi tasdiqlangan.

G’oliblar ichida eng kam ovozni Sirdaryo viloyati, Shirin shahri, Do‘stlik mahallasiga zamonaviy tungi yoritish chiroqlarini o’rnatish loyihasi to’plagan. Ushbu tashabbus uchun 126 ta ovoz berilgan. Loyihaga 270 mln so’m mablag’ ajratilishi tasdiqlangan.

Ma'lumot o'rnida, 2023-yildan viloyat budjetlari qo‘shimcha mablag‘larining 30 foizi ham “Tashabbusli budjet” loyihalariga beriladi. Bu haqda Prezident Shavkat Mirziyoyev amaldorlarga topshiriq bergan edi.

Shuningdek, bu yildan boshlab mahallalardagi infratuzilma uchun mablag‘lar faqatgina “Tashabbusli budjet” orqali aholi ovoz bergan loyihalarga ajratilishi belgilandi. Bunda “Tashabbusli budjet” loyihalari uchun mablag‘lar 3,5 baravarga oshirilib, 8 trillion so‘mga yetkaziladi.

“Shunda adolat bo‘ladi, odamlar o‘zlari hissa qo‘shgan loyihalarni albatta asrab-avaylaydi”, - degan edi prezident.

Mavzuga doir:

- Navoiyda maktab direktori o‘qituvchilarni "Tashabbusli budjet"ga ovoz to‘plashga majburlagani aytilmoqda

- Toshkent viloyatida "Open budjet"da ovoz yig‘ish uchun o‘quvchilardan pul yig‘gan maktab direktori ishdan olindi

- "Open budjet" ham noxolis tizimga aylanib bormoqda - Rasul Kusherbayev

- Surxondaryo viloyati Angor tumanida o’qituvchilar “Open budjet” loyihasiga majburan ovoz yig’ib yurgani aytilmoqda