"Yil ayoli", “Zulfiyaxonim izdoshlari”, “To‘maris izdoshlari” nomli milliy tanlovlar o‘tkaziladi

"Yil ayoli", “Zulfiyaxonim izdoshlari”, “To‘maris izdoshlari” nomli milliy tanlovlar o‘tkaziladi. Bu haqda AOKAda o‘tkazilgan brifingda Oila va xotin-qizlar qo‘mitasi axborot xizmati rahbari Saodat Boymirzayeva maʼlum qildi.

"Yil ayoli” milliy tanlovi 3 bosqichda o‘tkaziladi:

• 1-bosqich – tuman va shaharlarda 20 oktyabrdan -  30 oktyabrgacha;  
• 2-bosqich (hududiy bosqich) – Qoraqalpog‘iston Respublikasi, viloyatlar  va Toshkent shahrida 5 noyabrdan -20 noyabrgacha;
• respublika bosqichi dekabr oyining oxirgi 10 kunligida tantanali tarzda o‘tkaziladi.

Tanlovda 35 yoshdan yuqori bo‘lgan, o‘zi faoliyat ko‘rsatayotgan tashkilot nufuzini oshirishda faol ishtirok etayotgan hamda yo‘nalishi bo‘yicha faoliyat bilan kamida 5 yil mobaynida uzluksiz shug‘ullanib kelayotgan xotin-qizlar hamda uy bekalari ishtirok etishlari mumkin. 

“Zulfiyaxonim izdoshlari” tadbirlaridan maqsad Zulfiya nomidagi Davlat mukofotiga munosib nomzodlarni izlab topish.

Tanlovning tuman-shahar bosqichlari 30-oktyabrgacha, hududiy bosqichlari  5-noyabrdan 20 noyabrgacha bo‘lib o‘tadi. Hujjatlar tuman shahar Oila va xotin-qizlar bo‘limlari qoshidagi komissiyaga taqdim etiladi. 

Joriy yilning noyabr-dekabr oylarida Oila va xotin-qizlar qo‘mitasi tomonidan oliy taʼlim muassasalarida tahsil olayotgan xotin-qizlar o‘rtasida jamoalar shakllantirilib,  “To‘maris izdoshlari” nomli milliy tanlovi o‘tkazilishi belgilangan.

Ushbu tanlov umumtaʼlim maktablaridagi yuqori sinf o‘quvchi qizlari o‘rtasida ham  o‘tkaziladi.  Tanlov doirasida uchrashuvlar, davra suhbatlari, muloqotlar tashkil etiladi.