Belarus Markaziy saylov komissiyasi Aleksandr Lukashenkoni prezidentlik saylovlarida g‘olib deb e’lon qildi

27-yanvarga o‘tar kechasi Belarus Markaziy saylov komissiyasi prezidentlik saylovining dastlabki natijalarini e’lon qildi. Markaziy saylov komissiyasi ma’lumotlariga ko‘ra, Aleksandr Lukashenko eng ko‘p – 86,82 foiz ovoz olgan.

Ovoz berish ro'yxatida yana to'rtta shaxs bor edi. Markaziy saylov komissiyasi ma’lum qilishicha, Sergey Sirankov 3,21 foiz, Oleg Gaydukevich – 2,02 foiz, Anna Kanopatskaya – 1,86 foiz, Aleksandr Xijnyak – 1,74 foiz ovoz olgan.

Saylovchilarning 3,6 foizi hammaga qarshi ovoz bergan.

Belarus muxolifati yetakchisi Svetlana Tixanovich saylovlar oldidan na belarusliklar, na xalqaro hamjamiyat so‘zda aytilgan saylov natijalarini tan olmasligini aytdi. Yevropa Ittifoqi rasmiylari Belarusdagi saylovlarni erkin va adolatli deb hisoblamasligini ma'lum qildi.

Yevropa Ittifoqi Belarusdagi prezidentlik saylovi natijalarini tan olmasligini eʼlon qildi. Yevrokomissiya saylovni "soxta va noqonuniy" deb atadi.

Belarusda 1994-yildan beri hokimiyat tepasida turgan Aleksandr Lukashenko yettinchi bor prezidentlik saylovlarida qatnashdi.

Belarusda 2020-yilda bo‘lib o‘tgan avvalgi prezidentlik saylovlari mamlakat tarixidagi eng ommaviy norozilik namoyishlari bilan birga bo‘lgan edi. 

Namoyishlar Markaziy saylov komissiyasi Aleksandr Lukashenko saylovda 80,1 foiz, uning asosiy raqibi Svetlana Tixanovskaya esa 10,12 foiz ovoz olganini e’lon qilganidan keyin boshlandi. Belarus muxolifati saylovlarda katta soxtalashtirish va Tixanovskaya g'alaba qozonganini e'lon qildi.

Eslatib o'tamiz, bundan oldin Lukashenko mamlakatda ommaviy norozilik namoyishlari bo‘lsa, internetni butunlay o‘chirib qo‘yish bilan tahdid qilgan edi. Belarus prezidenti 2020-yilgi prezidentlik saylovidan keyingi norozilik namoyishlarida internet uzilishi ham uning buyrug‘i bilan amalga oshirilganini ta’kidladi. U agar bunday holat yana takrorlansa, “internet butunlay o‘chirilishi”ni aytgan.