Britaniya Ukraina askarlarini tayyorlash uchun Ukrainaga o‘z instruktorlarini yuboradi

Ayrim Yevropa davlatlari o‘t ochishni to‘xtatishga erishilsa, Ukrainaga tinchlikparvar kuchlarni joylashtirishni muhokama qilayotgan bir paytda Buyuk Britaniya u yerda harbiy instruktorlarini yuborishga tayyorlanmoqda. Mamlakat mudofaa vaziri Jon Xilining so‘zlariga ko‘ra, London Ukrainani qo‘llab-quvvatlashda yetakchi rolini o‘ziga olishi kerak.

Britaniya mudofaa vazirining ta’kidlashicha, ukrainalik askarlarning tayyorgarligi ularning ehtiyojlariga ko‘proq mos kelishini ta’minlash lozim. Va bu kabi tayyorgarlik jarayonlari hozirgidek Buyuk Britaniyada emas, balki Ukrainaning o‘zida tashkil etilishi maqsadga muvofiq.

Mudofaa vaziriga ko‘ra, Ukrainani «barcha frontlarda» mustahkamlash zarurati mavjud, chunki «yil yakunlanayotgan bo‘lsa ham, urush hali tugamayapti» va Kiyev har qanday muzokaralarga «kuchli pozitsiyadan turib» borishi kerak. Shu sababli Xili ukrainalik hamkasbi Rustem Umerovga Buyuk Britaniya 2025 yilda Ukrainaga qo‘llab-quvvatlovini qanchalik oshirishiga oid rejani taqdim etadi.

Qayd etilishicha, mazkur reja beshta banddan iborat va u britaniyalik instruktorlar tomonidan o‘qitiladigan ukrain askarlarining sonini oshirish, yangi qurollanishlarni taqdim etish, qo‘shimcha mablag‘ ajratish, Ukraina mudofaa sanoatiga ko‘maklashish kabi vazifalarni o‘z ichiga oladi.

Avvalroq Britaniyaning sobiq bosh vaziri Boris Jonson agar AQShning saylangan prezidenti Donald Tramp lavozimiga kirishganidan keyin Ukrainaga moliyaviy yordam berishni qisqartirsa, katta ehtimol bilan Buyuk Britaniya ushbu mamlakatga o‘z quruqlik qo‘shinlarini joylashtirishga majbur bo‘lishini ma’lum qilgandi.