Isroil Bosh vaziri HAMAS jangarilarini taslim bo‘lishga chaqirdi

Isroil Bosh vaziri Binyamin Netanyaxu HAMAS jangarilarini G‘azo sektorida zudlik bilan qurollarini tashlashga chaqirdi. Uning so'zlariga ko'ra, so‘nggi kunlarda ko‘plab taslim bo‘lishlar radikal islomiy Falastin tashkiloti tugash arafasida ekanidan dalolat bermoqda.

"Ular qurollarini tashlab, bizning qahramon askarlarimizga taslim bo'lishadi. Urush davom etmoqda, ammo bu HAMAS tugashining boshlanishidir. HAMAS terrorchilariga shuni aytmoqchmanki, bu nihoya. Darhol taslim bo'ling", dedi Isroil bosh vaziri.

Netanyaxu shu kunga qadar taslim bo'lgan o'nlab odamlar haqida gapirdi. Biroq, Isroil harbiylari hozircha bu haqda hech qanday dalil keltirmagan va HAMAS bu kabi da'volarning barchasini rad etmoqda.

Isroil ozodlik armiyasining yakshanba kungi ma'lumotlariga ko'ra, G'azo sektoridagi 24 soat ichida 250 dan ortiq nishonlar, jumladan, "HAMAS harbiy aloqa obyektlari" va G'azo sektori janubidagi yer osti tunnellari hujumga uchragan. Bundan tashqari, IDF'ning Telegram kanali xabariga ko'ra, Isroil kuchlari Shejaya batalyonining yangi qo'mondoni Emada Krikaeni yo'q qilishgan.

HAMASning avvalgi batalyon qo‘mondoni ham avvalroq urushda o‘ldirilgan edi. Isroil maʼlumotlariga koʻra, hozirgacha Gʻazo sektorida 98 askar halok boʻlgan, 600 ga yaqin askar yaralangan. Isroil o'ldirilgan dushman harbiy kuchlari sonini 7 ming nafarga yetganini qayd etdi.

HAMASning aytishicha, harbiy amaliyotlar davom etadi

Avvalroq HAMASning qurolli qanoti matbuot kotibi Abu Obeyda Isroil askarlariga qarshi harbiy amaliyotlar davom etishini aytgan edi. Barcha urinishlarga qaramay, Isroil kuchlari HAMASning “qarshiligini” sindira olmayapti, dedi u yakshanba kuni mahalliy televideniyega bergan intervyusida.

Shuningdek, u agar tashkiloti talablari bajarilmasa, G'azo sektoridagi garovga olinganlarning birortasi ham tirik qolmasligini aytdi. Noyabr oyi oxirida HAMAS vakili agar buning evaziga Isroildagi barcha falastinlik mahbuslar ozod qilinsa, ular garovga olinganlarni, jumladan, Isroil askarlarini ham ozod qilishga tayyor ekanliklarini ma'lum qilgan edi.