Kanada JSTga AQSh bojlari ustidan shikoyat qildi

Kanada AQShning po‘lat va alyuminiy importiga qo‘shimcha tariflar joriy qilgani yuzasidan Jahon savdo tashkiloti (JST)ga shikoyat qildi. Bu haqda 13 mart, payshanba kuni JST ma’lum qildi.

«Kanada JSTdan Kanadadan ayrim turdagi po‘lat va alyuminiy mahsulotlariga import bojlari joriy etilishi bo‘yicha AQSh bilan o‘z kelishmovchiligi yuzasidan maslahatlashuvlar o‘tkazishni so‘radi», — deyiladi tashkilot saytida.

Unda, Ottavaning fikricha, Vashingtonning yangi tariflari JST tashkil etilishidan oldingi 1994 yildagi Tariflar va savdo bo‘yicha bosh kelishuv (TSBK) bo‘yicha majburiyatlarni buzayotgani aniqlangan.

Tramp Kanadaning javob bojlariga agressiv reaksiya bildirdi

AQSh prezidenti Donald Tramp Kanada bosh vaziri Jastin Tryudoga agar Kanada Amerikadan import qilinadigan tovarlarga bojlar joriy qilsa, import bojlari yanada oshishi bilan tahdid qildi. 

«Iltimos, Kanada gubernatori Tryudoga tushuntirib qo‘ying, u Qo‘shma Shtatlarga javob tariflarini kiritsa, bizning tariflarimiz darhol xuddi shu miqdorga oshadi!» - deya u 4 mart kuni kechqurun o‘zining Truth Social platformasida yozdi. 

Tramp go‘yo Kanada AQSh shtati ekanini nazarda tutib, qo‘shni davlat bosh vazirini yana gubernator deb atadi.

Avvalroq, Tryudo Ottavadagi matbuot anjumanida Donald Tramp tomonidan boshlangan savdo mojarosida AQShning hozirgina kuchga kirgan tariflarini muhokama qilish uchun agressiv pozitsiyani egallagan edi. «AQSh o‘zining eng yaqin hamkori va ittifoqchisi, eng yaqin do‘sti Kanadaga qarshi savdo urushini boshladi. Shu bilan birga, ular Putinni rozi qilish, Rossiya bilan ijobiy hamkorlik qilish haqida gapiryapti», — dedi Kanada bosh vaziri. AQSh prezidentiga shaxsan murojaat qilib, u shunday dedi: «Donald, sen juda aqlli yigit bo‘lsang ham, bu ahmoqlik».