Kim Chen In Putinni «eng yaqin do‘st» deb atadi

Shimoliy Koreya yetakchisi Kim Chen In Vladimir Putinni yangi yil bilan tabriklab, uni «eng yaqin do‘sti» deb atadi. Bu haqda Shimoliy Koreyaning KMTA axborot agentligi xabar berdi. «O‘rtoq Kim Chen In o‘zining eng yaqin do‘sti Putinni yangi yil bilan samimiy tabriklab, qardosh rus xalqiga, jasur rus armiyasining barcha harbiy xizmatchilariga o‘z nomidan, Koreya xalqi va respublika qurolli kuchlarining barcha askar va ofitserlari nomidan samimiy tabrik yo‘lladi», — deyiladi xabarda.

Kim Putinga Ukrainaga qarshi urushda g‘alaba tiladi

KMTA ma’lumotlariga ko‘ra, Kim «2024 yilning strategik ahamiyati, yangi darajadagi do‘stona munosabatlar sifatida an’anaviy Koreya-Rossiya munosabatlarini rivojlantirishga olib kelgan muhim yo‘lni» eslatdi. U Putinga 2025 yil «XXI asrda Rossiya armiyasi va xalqi neonatsistlarni yengib, buyuk g‘alaba qozonadigan urushda g‘alaba yili bo‘lishini» tilagan.

Kreml saytida Kim Chen In Putinni yangi yil bilan tabriklagan davlat va hukumat rahbarlaridan biri sifatida qayd etilgan. Ushbu tabrikning aniq matni yo‘q. Kremldan tabrik telegrammalarini olganlar orasida Germaniyaning sobiq kansleri Gerhard Shryoder ham bor.

NYT: KXDR qo‘shinlarini Rossiyaga yuborish g‘oyasi Pxenyandan chiqqan

Shimoliy Koreya qo‘shinlarini Ukrainaga qarshi urushda qatnashish uchun Rossiyaga yuborish g‘oyasi Moskvadan emas, Pxenyandan chiqqan, deb yozadi The New York Times (NYT) 23 dekabr kuni o‘z manbalariga tayanib. Uning so‘zlariga ko‘ra, bu tashabbus Moskva va Pxenyan o‘rtasida strategik sheriklik to‘g‘risidagi bitim imzolangandan so‘ng darhol paydo bo‘lmagan. «AQSh razvedka idoralari bu Rossiyaning emas, Shimoliy Koreyaning g‘oyasi degan xulosaga keldi, garchi prezident Vladimir Putin buni tezda qabul qilgan bo‘lsada», deb yozadi NYT.

Biroq, materialda ta’kidlanganidek, Shimoliy Koreya «yordam» evaziga «darhol hech narsa olmadi» va uning rahbari Kim Chen In hozirda Moskvadan kelajakda — texnologiya, diplomatik yordam ko‘rinishida minnatdorchilikka umid qilmoqda. Bu G‘arb bilan qarama-qarshilik va inqirozli vaziyatlarda RFning boshqa harakatlarini ham nazarda tutadi, deydi manbalar.