O'zbekiston va Kuvayt o'rtasida mehnat migratsiyasi sohasida hamkorlik kengaytiriladi

O'zbekiston elchisi Ayubxon Yunusov Kuvayt Ishchi kuchi bo'yicha bosh qo'mitasi direktori Marzuq al-Utaybiy bilan uchrashuv o'tkazdi. 

Muzokaralar O'zbekiston Prezidentining shu yil 17-oktabrdagi "Xorijda mehnat faoliyatini amalga oshirish jarayonlarini tartibga solish bo'yicha qo'shimcha chora-tadbirlar to'g'risida"gi qarorida belgilangan vazifalar ijrosi doirasida tashkil etildi.

Tomonlar migratsiya sohasida hamkorlikni jadallashtirish, Kuvaytning turli davlat va xususiy sektorlarida O'zbekiston fuqarolarini qonuniy tarzda ish bilan ta'minlash masalalarini muhokama qildilar.

Marzuq al-Utaybiy Kuvaytdagi mehnat bozori ehtiyojlari asosida zarur mutaxassisliklar bo'yicha malakali xorijiy ishchi kuchini yollash jarayonini rivojlantirish bo'yicha izchil sa'y-harakatlar olib borilayotganini bildirdi. Hozirgi kunda Kuvayt mehnat bozorida asosan sog'liqni saqlash va xizmat ko'rsatish tarmoqlarida ishchi kuchiga ehtiyoj borligi ma'lum qilindi.

Uchrashuvda ushbu sohalarda O'zbekiston fuqarolarini Kuvaytda ish bilan ta'minlash uchun ikki tomonlama hamkorlikning huquqiy asoslarini yaratishning muhimligi ta'kidlandi.

Muloqot yakunida ikki davlatning tegishli tashkilotlari o'rtasida xususiy sektorda ishchi kuchi bilan almashish sohasida o'zaro anglashuv memorandumi loyihasini ishlab chiqish va imzolash, shuningdek, tomonlar o'rtasida onlayn muzokaralar o'tkazish to'g'risida ahdlashib olindi.