Oʻzbekiston yoshlar terma jamoasi bosh murabbiyi Ravshan Haydarov U-20 Jahon chempionati oldidan jamoaning tayyorgarligi va tarkibi haqida ma'lumot berdi

Oʻzbekiston yoshlar terma jamoasi bosh murabbiyi Ravshan Haydarov U-20 Jahon chempionati oldidan jamoaning tayyorgarligi va tarkibi haqida ma'lumot berdi. 

Tayyorgarlik haqida:

Osiyo chempionatidan keyin yaxshi yigʻinlar oʻtkazishga erishdik. Xususan, Ispaniyadagi yigʻinda Braziliya, Dominikan Respublikasi va Gibraltarga qarshi uchrashuvlar oʻtkazdik. Keyinchalik reja asosida jismoniy tayyorgarlik, taktik ishlanmalar boʻyicha ish olib bordik.

JCh tashkilotchiligi haqida:

Tashkilotchilik haqida ijobiy fikrdaman. Biz turgan shaharcha biroz kichikroq, lekin eng asosiysi maydonlarning holati yaxshi.

Tarkib haqida:

Turdimurodovni yangi deb boʻlmaydi, u koʻplab yigʻinlarimizda ishtirok etgan. Ayni paytda u oʻzining yaxshi formasida. Hujum chizigʻini kuchaytirish maqsadida uni jalb etganmiz. Avvalgi yigʻinlarda barcha futbolchilarga imkoniyat berildi, kim oʻzini yaxshi koʻrsatgan boʻlsa, oʻshani tarkibga kiritdik.

Argentina haqida:

Argentina bilan oʻtgan yili ham oʻynaganmiz. Ularni soʻnggi oʻyinlarini tahlil qildik, kuchli va kuchsiz tomonlarini oʻrgandik va shunga yarasha  tayyorgarlik olib bormoqdamiz.

Kuchli raqib, nom yuzasidan hech qanday bosim yoʻq. Chunki biz nafaqat Argentina, balki Urugvay, Braziliya ham bilan oʻynab, yetarlicha tajriba toʻpladik. Shu oʻrinda tayyorgarlik jarayonida kuchli raqiblar bilan oʻyinlar tashkil etgani uchun rahbariyatga va xalqaro aloqalar boʻlimi mutaxassislariga minnatdorchilik bildiraman.

Jamoa oldiga qoʻyilgan maqsad haqida:

Avval ham Jahon chempionatlarida ishtirok etganmiz. Shu sababli oldimizga oliy maqsadni qoʻyganmiz, qolaversa, avvalgi ishtiroklarimizdagi natijalarimizni yaxshilashni ham maqsad qilganmiz. Bolalarning ishtiyoqi baland, ularda oʻzlariga nisbatan ishonch bor. Oʻylaymanki, Jahon chempionatiga tayyormiz.

Biz hozir olisdamiz, shu sababli muxlislarimizning qoʻllab-quvvatlashlariga ehtiyoj sezamiz. Xalqimiz oynayi jahon orqali bizni koʻrib turganini albatta his qilamiz, ularning duolari biz uchun muhim.

Eslatib o'tamiz, o'yin 21-mayga o'tar kechasi soat 02:00 da UZREPORT TV da to'g'ridan-to'g'ri translyatsiya qilinadi.