Yilning eng faol olimlari taqdirlandi

O‘zbek olimlari mutafakkirlarimiz qoldirgan ilmiy merosni chuqur o‘rganib, o‘zlarining yangi kashfiyotlari bilan fanimizni boyitishga munosib hissa qo‘shmoqda.

Albatta, boshqa soha vakillari qatori olimlar ham mehnatlariga yarasha rag‘bat olishni istaydilar. Ular uchun eng katta e’tirof ilmiy-tadqiqot natijalarini dunyoga tanitishdir. “SCIENCE AND INNOVATION” xalqaro ilmiy jurnali  olimlarimizning ilmiy-tadqiqot natijalari haqida yetarlicha ma’lumot berayotgan nashrlardan biri.  

Mazkur jurnal jamoasi hamda Uzreport telekanali tomonidan har yili an’anaviy tarzda “SCIENCE AND INNOVATION AWARDS”   ilm-fan bayrami bo‘lib o‘tadi.  

Turkiston san’at saroyida bo‘lib o‘tgan bu yilgi taqdirlash marosimiga oliy ta’lim muassasalari rektorlari, ilmiy-tadqiqot institutlari direktorlari, akademiklar, professor-olimlar tashrif buyurdi.  

Tadbirda taniqli san’atkorlar va so‘z ustalari mehmon bo‘ldi.  

Tanlovda tadqiqotchi-olimlardan 200 ga yaqin arizalar kelib tushdi. Har bir nominatsiya bo‘yicha 10 nafardan finalistlar saralab olindi.  

Bu gal g‘oliblar “Yil olimi”, “Yilning eng yaxshi yosh olimi”, "Yilning eng yaxshi oliy ta’lim muassasasi", "Yilning eng yaxshi ilmiy-tadqiqot instituti", "Yilning eng yaxshi innovatsion universiteti" nominatsiyalari bo‘yicha taqdirlandi.  

Tadbirda “Yil olimi” hamda “Yilning eng yaxshi yosh olimi” nominatsiyalari bo‘yicha pul mukofotlari ham g‘oliblarga topshirildi.  

Ushbu bayram olimlarimiz o‘rtasida fikr-almashish, hamsuhbat bo‘lishga imkon yaratdi. Ta’kidlash joizki, yil yakunida berilgan rag‘bat kelasi yilda amalga oshiriladigan ilmiy-tadqiqotlar uchun motivatsiya beradi.