Butunjahon shaxmat Olimpiadasi chempionlariga pul mukofotlari topshirildi

Xabaringiz bor, Hindistonning Chennay shahrida 44-Butunjahon shaxmat Olimpiadasi boʻlib oʻtdi. Mazkur musobaqadan shaxmatchilarimiz tarixiy gʻalaba bilan qaytishdi.

Quvonarli jihati, unda Oʻzbekiston erkaklar terma jamoasi umuman magʻlubiyatga uchramagan yagona jamoa boʻldi. Ayollar terma jamoasi ham 162 ta jamoa orasida musobaqani 31-oʻrinda yakunlashdi. Prezidentimiz chempion shaxmatchilarimizni gʻalaba bilan muborakbod etgan holda avtomobil va pul mukofoti bilan taqdirladi.

Shu munosabat bilan Oʻzbekiston Respublikasi Sportni rivojlantirish vazirligida Butunjahon shaxmat olimpiadasi gʻoliblariga tantanali ravishda pul mukofotini topshirish marosimi boʻlib oʻtdi.

Gʻoliblar nomidan Jahongir Vohidov soʻzga chiqdi. U oʻz nutqida mamlakatimizda yaratilgan barcha sharoitlar uchun davlatimiz rahbariga minnatdorlik bildirdi. Shuningdek, shaxmatchilarimiz 2024-yilda Vengriyada boʻlib oʻtadigan olimpiadada ham gʻalaba qozonish va chempionlikni saqlab qolish uchun bor kuch-gʻayratini ishga solishini aytib oʻtdi. Tadbir yakunida shaxmatchilarning har biriga 600 mln so'm naqd pul mukofotlari topshirildi.

Eslatib oʻtamiz, 2026-yilgi 46-Butunjahon shaxmat olimpiadasiga Oʻzbekiston mezbonlik qiladi.