Mers va Tramp Ukraina bo‘yicha hamkorlikni muhokama qildi

Germaniya kansleri va AQSH prezidenti Rossiyaning Ukrainadagi harbiy tajovuzini to‘xtatish uchun yaqindan hamkorlik qilishga kelishib oldi. Bu Fridrix Mers va Donald Tramp o‘rtasidagi birinchi telefon suhbati bo‘ldi.

Germaniyaning yangi kansleri Fridrix Mers 8 may, payshanba kuni ilk bor AQSH prezidenti Donald Tramp bilan suhbatlashdi. Suhbat chog‘ida Mers Oq uy rahbarini Germaniyaga, Tramp esa o‘z navbatida Germaniya kanslerini Vashingtonga taklif qildi, deb xabar beradi dpa.

Ularning yarim soatga yaqin davom etgan suhbatining asosiy qismi Ukrainadagi urush masalasiga bag‘ishlandi. Germaniya hukumati matbuot kotibi Shtefan Korneliusning so‘zlariga ko‘ra, Germaniya va Qo‘shma Shtatlar Rossiya harbiy agressiyasini to‘xtatish uchun yaqin hamkorlik qilishga kelishib olgan. Tramp va Mers Rossiya muzokaralar uchun joy yaratishda o‘t ochishni to‘xtatishga rozi bo‘lishi kerakligi haqida kelishib oldi. AQSH prezidenti Yevropaning Ukrainaga tinchlik o‘rnatishga qaratilgan saʼy-harakatlarini qo‘llab-quvvatlashni xohlashini aytdi, dedi Kornelius.

Mers va Tramp, shuningdek, mamlakatlar o‘rtasidagi savdo kelishmovchiliklarini imkon qadar tezroq hal qilish zarurligi haqida kelishib oldilar.

Fridrix Mers avvalroq AQSHga joriy yilning iyun oyida bo‘lib o‘tadigan G7 va NATO sammitlari oldidan tashrif buyurish niyatida ekanini aytgan edi.

7 may kuni Fridrix Mers Fransiya prezidenti Emmanuel Makron bilan Ukrainadagi vaziyatni hal qilish masalalarini muhokama qildi. Germaniya kanslerining so‘zlariga ko‘ra, urushni «AQSH tomonidan keyingi siyosiy majburiyatlarsiz» to‘xtatib bo‘lmaydi. Mers yevropaliklar AQSH rolini almashtira olmasligini taʼkidladi.