Qirg‘iziston Respublikasida yil oxirigacha barcha uylar sug‘urta qilinadi

Qirg‘iziston Vazirlar Mahkamasi raisi Oqilbek Japarov davlat organlariga 2024-yil oxirigacha barcha uylarni sug‘urtalashni topshirdi. Bu haqda Kloop xabar berdi.

Japarov 2024-yilda respublikada sodir bo‘lgan sellar oqibatlarini bartaraf etish masalalariga bag‘ishlangan yig‘ilishda shunday topshiriq bergan. U xavf zonasida joylashgan uylar ham sug‘urta qilinishi kerakligini aytgan. 

Bu tabiiy ofatlar takrorlansa, “fuqarolarning moliyaviy himoyasini ta’minlash” va uy-joyidan ayrilgan oilalar uchun oqibatlarni minimallashtirish imkonini beradi.

Vazirlar Mahkamasida hali sug‘urtalanmagan uylar soni e’lon qilinmadi. Biroq Qirg‘izistonda kamida 55 mingta turar joy sel oqimlari ta’sir qilishi mumkin bo‘lgan hududda joylashgan. Ularning qanchasi sug‘urta qilingani noma’lum.

Sug‘urta odamlarga tabiiy ofatlardan keyin tezroq tiklanishga yordam beradigan va davlat byudjetiga yukni kamaytiradigan muhim vositaga aylanadi. Vazirlar Mahkamasi rahbari global isish tufayli tabiiy ofatlar soni yildan-yilga ortib borishini ta’kidladi. Shu munosabat bilan ko‘chmas mulkni sug‘urtalash, xavfsizlikni ta’minlashning zaruriy chorasiga aylanib bormoqda, deyiladi Vazirlar Mahkamasi xabarida.

Shuningdek, Japarov mahalliy aholi uchun “favqulodda vaziyatlarda qanday harakat qilishni bilishi uchun” axborot kampaniyalarini tashkil etishga topshiriq bergan.

Qirg‘izistonda 2024-yil sentyabr holatiga ko‘ra 331 ta sel oqimi qayd etilgan. Natijada 5354 ta uy zarar ko‘rgan. Shundan 102 nafariga zarar yetgan, 138 nafari esa kapital ta’mirga muhtoj.