Tramp Ukrainadan 500 milliard dollarlik nodir metallar olmoqchi

AQSh prezidenti Donald Tramp Fox News’ga bergan intervyusida Ukraina Amerika investitsiyalarining xavfsizligini kafolatlashi kerakligini aytdi, chunki u bir kun kelib “Rossiyaga aylanishi” mumkin. Uning so‘zlariga ko‘ra, Ukrainada muhim yer osti boyliklari, jumladan, noyob metallar, neft va gaz bor, va AQSh allaqachon mamlakatga yuzlab milliard dollar sarmoya kiritganligi sababli, ushbu mablag‘larning ekvivalentini qaytarib olmoqchi.

“Men bizning pullarimiz xavfsiz bo‘lishini istayman. Chunki biz yuzlab milliard dollar sarflayapmiz. Ular kelishuvga erishishi yoki erishmasligi mumkin. Bir kun kelib Rossiyaga aylanishi mumkin. Yoki aylanishi mumkin emas”, — dedi prezident.

Donald Trampning ta’kidlashicha, Vashington Ukrainaga 300 milliard dollardan ortiq mablag‘ ajratgan, Yevropa esa taxminan 100 milliard dollar bergan. Endi u ushbu mablag‘larni qaytarib olmoqchi. 

“Men ularga 500 milliard dollarlik noyob metallar ekvivalentini xohlayotganimni aytdim, va ular, aslida, bunga rozi bo‘lishdi. Shunday qilib, hech bo‘lmaganda, biz o‘zimizni ahmoqdek his qilmaymiz. Aks holda, biz ahmoqmiz”, — deya qayd etdi prezident.

O‘tgan haftada Donald Tramp AQSh yordamining Ukraina tomonidan noyob metallar evaziga qoplanishi to‘g‘risida kelishuv tuzishni rejalashtirayotganini bildirgan edi. Bu bayonotga javoban, Ukraina prezidenti Vladimir Zelenskiy xavfsizlik kafolatlari evaziga shunday kelishuvga rozi ekanini ma’lum qildi.

• Ukrainaning Forbes jurnali baholariga ko‘ra, 2023-yil aprel holatiga ko‘ra, Ukrainadagi foydali qazilmalar umumiy qiymati taxminan 15 trillion dollarni tashkil qiladi. Shundan 70% dan ortig‘i Rossiya tarkibiga qo‘shilgan DXR va LXR, shuningdek, Dnipropetrovsk viloyatiga to‘g‘ri keladi.