Tramp Yamandagi husiylarga qarshi harbiy operatsiya boshladi

AQSh prezidenti Donald Tramp amerikalik harbiylarga Yamandagi husiylarga qarshi “hal qiluvchi va kuchli” harbiy chora ko‘rishni buyurdi. Bu haqda u 15-mart, shanba kuni Truth Social ijtimoiy tarmog‘ida yozdi. Uning so'zlariga ko'ra, AQSh harbiylari "hozirda" Amerika kemalarini himoya qilish va Qizil dengizda navigatsiya erkinligini tiklash uchun guruh bazalari, yetakchilari va raketaga qarshi mudofaa tizimlariga havo hujumlarini amalga oshirmoqda.

Tramp husiylarni Amerika va boshqa kemalar, samolyotlar va dronlarga qarshi “qaroqchilik, zo‘ravonlik va terrorizmning tinimsiz kampaniyasi” olib borishda aybladi. Uning ta'kidlashicha, AQShning sobiq prezidenti Jo Baydenning xatti-harakatlari unchalik qattiq bo'lmagan, shuning uchun husiylar hujumlarini davom ettirgan.

Trampning soʻzlariga koʻra, zarbalar guruh kemalarga hujumlarni toʻxtatmaguncha va mintaqada xavfsizlik tiklanmaguncha davom etadi. U, shuningdek, Eronga tahdid qilib, husiylarni qo‘llab-quvvatlashni “zudlik bilan to‘xtatishni” talab qildi va agar aralashsa, Tehronni javobgarlikka tortishga va’da berdi.

Husiylarga tegishli Al Masirah telekanali Yaman poytaxti Sana shahriga hujumlar haqida xabar berdi. Husiylar tomonidan boshqariladigan sog‘liqni saqlash idoralariga ko‘ra, AQSh havo kuchlarining zarbalari oqibatida kamida to‘qqiz kishi halok bo‘lgan va yana to‘qqiz kishi yaralangan.